ەلىمىزدىڭ 13 وڭىرىندە 43 گرادۋسقا دەيىن ىستىق بايقالادى
استانا. قازاقپارات - قازگيدرومەت ەل ايماقتارىندا 24-شىلدەدە بولاتىن قاۋىپتى مەتەورولوگيالىق قۇبىلىستارعا بولجام جاسادى، دەپ حابارلايدى قازاقپارات.
اتموسفەرالىق فرونتالدى بولىمدەردىڭ وتۋىنە بايلانىستى ەلىمىزدىڭ باسىم بولىگىندە تۇراقسىز اۋا رايى ساقتالادى، نايزاعايدى جاڭبىر، باتىستا - قاتتى جاڭبىر جاۋادى. تەك ەلىمىزدىڭ وڭتۇستىگىندە، شىعىسىندا جانە ورتالىعىندا كوبىنەسە جاۋىن- شاشىنسىز اۋا رايى كۇتىلەدى. رەسپۋبليكا بويىنشا جەلدىڭ كۇشەيۋى بايقالادى، تۇندە جانە تاڭەرتەڭ سولتۇستىكتە تۇمان تۇسەدى.
«كۇندىز جامبىل، ماڭعىستاۋ، اتىراۋ، قىزىلوردا، تۇركىستان، الماتى، قاراعاندى، جەتىسۋ، اباي وبلىستارىندا، اقتوبە، شىعىس قازاقستان وبلىستارىنىڭ وڭتۇستىگىندە 35-43 گرادۋس قاتتى ىستىق بولادى.
كۇندىز الماتى وبلىسىنىڭ سولتۇستىگىندە جانە ورتالىعىندا 42 گرادۋس وتتە قاتتى ىستىق كۇتىلەدى.
الماتى، تۇركىستان، جامبىل، شىعىس قازاقستان، قاراعاڭدى، ۇلىتاۋ، جەتىسۋ، اباي وبلىستارىندا، قىزىلوردا وبلىسىنىڭ ورتالىعىندا، شىعىسىندا، پاۆلودار وبلىسىنىڭ وڭتۇستىگىندە، اقتوبە وبلىسىنىڭ وڭتۇستىك- شىعىسىندا، ماڭعىستاۋ وبلىسىنىڭ باتىسىندا، اتىراۋ وبلىسىنىڭ باتىسىندا جانە سولتۇستىگىندە توتەنشە ءورت قاۋىپى ساقتالادى»، - دەپ جازدى سينوپتيكتەر.
سولتۇستىك قازاقستان وبلىسىندا، قوستاناي وبلىسىنىڭ وڭتۇستىگىندە، اقمولا وبلىسىنىڭ وڭتۇستىگىندە، سولتۇستىگىندە، شىعىسىندا جوعارى ءورت قاۋىپى ساقتالادى.
