قازاقستاندا كۇنكورىس دەڭگەيى 12 پايىزعا ءوستى

نۇر-سۇلتان. قازاقپارات - قازاقستاندا 2020 -جىلدىڭ قاڭتارىندا جان باسىنا ەسەپتەگەندە كۇنكورىس مينيمۋمى 30 مىڭ تەڭگەگە جەتىپ، 11,6 پايىز ءوسىمدى كورسەتىپ وتىر، دەپ حابارلايدى قازاقپارات ءتىلشىسى finprom.kz زەرتتەۋىنە سىلتەمە جاساپ.

زەرتتەۋگە سۇيەنسەك، تۋرا ءبىر جىل بۇرىنعى كورسەتكىش 26,9 مىڭ تەڭگە بولىپ، جىلدىق ءوسىم 4 پايىزدى قۇراعان.

«بيىل قاڭتار ايىندا تاۋارلار مەن قىزمەتتەردىڭ باعاسى وتكەن جىلدىڭ قاڭتار ايىمەن سالىستىرعاندا 5,6 پايىزعا ءوستى. ونىڭ ىشىندە ازىق- تۇلىك تاۋارلارىنىڭ باعاسى 9,2 پايىز، ازىق-تۇلىككە جاتپايتىن تاۋارلار 5,2 پايىز، اقىلى قىزمەتتەر 1,4 پايىز دەڭگەيگە ءوستى. ەڭ جوعارى كۇنكورىس مينيمۋمى بۇرىنعىشا ماڭعىستاۋ وبلىسىندا - 35,4 مىڭ تەڭگەلىك دەڭگەيدە. بۇل بۇكىل ەل بويىنشا ورتاشا دەڭگەيدەن 18 پايىزعا جوعارى كورسەتكىش»، - دەلىنگەن زەرتتەۋ قورىتىندىسىندا.

كونكورىس مينيمۋمىنىڭ مولشەرى بويىنشا ۇزدىك ۇشتىكتى نۇر- سۇلتان قالاسى (33,5 مىڭ ت گ) مەن الماتى (33,1 مىڭ ت گ) تۇيىندەيدى. ۇزدىك بەستىك ساپىندا سونىمەن قاتار الماتى (30,7 مىڭ) مەن تۇركىستان (30,3 مىڭ) وبلىستارى تۇر. جالپى ەلدە التى وڭىردە كۇنكورىس مينيمۋمىنىڭ مولشەرى ورتاشا رەسپۋبليكالىق دەڭگەيدەن جوعارى.

ال كۇنكورىس مينيمۋمىنىڭ تومەنگى دەڭگەيى پاۆلودار (26,3 مىڭ ت گ)، باتىس قازاقستان (26,9 مىڭ ت گ) جانە اقتوبە (27,2 مىڭ ت گ) وبلىستارىندا بايقالادى.