دونالد ترامپ پەن كيم چەن ىن 12 - ماۋسىمدا كەزدەسۋى مۇمكىن

ۆاشينگتون- سەۋل. قازاقپارات - ا ق ش پرەزيدەنتى دونالد ترامپ وتكەن جۇما كۇنى سولتۇستىك كورەيا كوشباسشىسى كيم چەن ىنمەن جوسپارلانعان كەزدەسۋدىڭ 12 - ماۋسىمدا ءوتۋى مۇمكىن ەكەندىگىن مالىمدەدى، دەپ حابارلايدى ريەنحاپ.
None
None

ترامپ تاراپتاردىڭ سينگاپۋردە بولۋى ءتيىس كەزدەسۋ ماسەلەسىن ءالى دە تالقىلاپ جاتقاندىعىن ايتتى.

«ءارى قاراي نە بولاتىنىن كورەمىز. كەزدەسۋ 12-سىندە ءوتۋى مۇمكىن. ديالوگ جالعاسىپ جاتىر. ولار (سولتۇستىك كورەيا) كەزدەسۋ وتكىزۋدى قاتتى قالايدى. ءبىز دە سونى قالايمىز. بۇدان نە شىعاتىنىن كورەمىز»، - دەپ اتاپ ءوتتى ترامپ اق ۇيدە جۋرناليستەرگە.

كەيىنىرەك ترامپ تۋيتتەردە قازىرگى تاڭدا قۇراما شتاتتار مەن سولتۇستىك كورەيا اراسىندا «ناتيجەلى كەلىسسوزدەردىڭ» ءجۇرىپ جاتقاندىعىن جازدى. ەگەر، بۇل ناتيجە بەرسە، كەلىسسوزدەردىڭ 12 - ماۋسىمدا سينگاپۋردە وتەتىنىن قوسا ايتتى.

«ءبىز سولتۇستىك كورەيامەن سامميتتى قالپىنا كەلتىرۋ تۋرالى جەمىستى كەلىسسوزدەر جۇرگىزىپ جاتىرمىز. ەگەر ول وتەتىن بولسا، 12 - ماۋسىمدا سينگاپۋردە بولۋى مۇمكىن»، - دەدى ول.

ترامپ سولتۇستىك كورەيا تاراپىنان «اشىق جاۋلاسۋ» بولىپ جاتقاندىعىن ايتىپ، ءبىر كۇن بۇرىنعى كەزدەسۋدى بولدىرماعان ەدى. كيم چەن ىن ەكەۋى سولتۇستىك كورەياداعى يادرولىق باعدارلامانى جويۋ تۋرالى سويلەسۋ ءۇشىن كەزدەسۋگە ۋاعدالاسقان بولاتىن. ءبىراق، پحەنيان جاقىندا ا ق ش- تى ءبىرجاقتى رەتپەن ەلدىڭ يادرولىق مۇمكىندىكتەن باس تارتۋعا ماجبۇرلەپ، سامميتتە قاتىسپايتىنىن ايتىپ، قورقىتتى دەپ ايىپتادى.

 سولتۇستىك كورەيا بيلىگى سارسەنبى كۇنگى مالىمدەمەسىندە ا ق ش- قا «يادرولىق» شاقىرۋ جاساپ، ا ق ش ۆيتسە- پرەزيدەنتى مايك پەنستى «ساياسي قاراقشى» دەپ اتادى.

الايدا، ترامپ بەيسەنبى كۇنى ءسامميتتى بولدىرماعاننان كەيىن، سولتۇستىك كورەيا مۇنداي مالىمدەمەلەرىن ازايتتى.

«ءبىز امەريكالىق تاراپقا كەز كەلگەن ۋاقىتتا ماسەلەلەردى شەشۋ ءۇشىن ۇستەلگە وتىرىپ، كەلىسسوزدەر جۇرگىزۋگە نيەتتى ەكەندىگىمىزدى تۇسىندىرگىمىز كەلەدى»، - دەپ مالىمدەدى سولتۇستىك كورەيانىڭ سىرتقى ىستەر مينيسترلىگى.

جۇما كۇنى ترامپ پحەنياننىڭ مالىمدەمەسىن ەستىپ، قۋانعانىن جانە مۇنىڭ بەيبىتشىلىك پەن تىنىشتىق ورناتۋعا اكەلەتىنىنە سەنىم بىلدىرەتىنىن جەتكىزدى.

 ا ق ش سىرتقى ىستەر ءمينيسترى دجەيمس مەتتيس سامميتتىڭ بولاتىنىنا ۇمىتتەنەتىنىن ايتتى.

سوڭعى جاڭالىقتار