جەمقورلاردان تاركىلەنگەن 120 ميلليارد تەڭگە ءبىلىم بەرۋدى قولداۋ قورىنا ءتۇستى

بۇل تۋرالى بۇگىن پرەزيدەنت قاسىم-جومارت توقايەۆتىڭ قابىلداۋىندا بولعان پرەمەر-ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات.

ءمالىم بولعانداي، مەملەكەت باسشىسىنىڭ تاپسىرماسىنا سايكەس، سىبايلاس جەمقورلىققا قاتىستى قىلمىستىق ىستەر بويىنشا تاركىلەنگەن قاراجات «ءبىلىم بەرۋ ينفراقۇرىلىمىن قولداۋ قورىنا» جىبەرىلىپ جاتىر. قازىرگى كەزدە ارنايى شوتتا 120 ميلليارد تەڭگەگە جۋىق قاراجات جينالعان. ولار مەكتەپتەردىڭ قۇرىلىسى مەن جوندەۋ جۇمىستارىنا جۇمسالاتىن بولادى.

كەزدەسۋ سوڭىندا قاسىم-جومارت توقايەۆ بيۋجەت قاراجاتىن ءتيىمدى پايدالانۋعا، مەملەكەت قارجىسىنىڭ جاعدايىن جاقسارتۋعا، سونداي-اق سالىقتىق جانە كەدەندىك اكىمشىلەندىرۋ ءىسىن جەتىلدىرۋگە باعىتتالعان ءبىرقاتار تاپسىرما بەردى.

ەسكە سالايىق، پرەزيدەنت توقايەۆ بىلتىر 1- جەلتوقساندا جاريالاعان جولداۋىندا: «جەمقورلاردىڭ زاڭسىز تاپقان قارجىسى ولار سوتتالعان سوڭ مەملەكەتكە ءوتىپ، تۇگەلدەي مەكتەپ قۇرىلىسىنا جۇمسالۋعا ءتيىس»، - دەپ اتاپ وتكەن بولاتىن.

جولداۋ جاريالانعان ءبىر ايدان استام ۋاقىتتان كەيىن ۇكىمەت باسشىسى ءاليحان سمايىلوۆ «ءبىلىم بەرۋ ينفراقۇرىلىمىن قولداۋ قورىنىڭ» ەسەپشوتىنا 50 ميلليارد تەڭگە تۇسكەنىن ءمالىم ەتتى. ونىڭ مالىمەتىنشە، بۇل قاراجات ورىن تاپشىلىعى بار، ءۇش اۋىسىمدا ءبىلىم بەرەتىن جانە اپاتتى جاعدايداعى مەكتەپتەرى بار وڭىرلەردە جاڭا نىساندار سالۋعا باعىتتالاتىن بولادى.