قازاقستاندا 1200 شەنەۋنىك مەملەكەتتىك قىزمەتتە جۇمىس ىستەي المايدى
بۇل تۋرالى بۇگىن استانادا ە ى د ۇ سىبايلاس جەمقورلىققا قارسى جەلىسى قۇقىق قورعاۋ ورگاندارىنىڭ جەتىنشى وتىرىسىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ورىنباسارى اليك شپەكبايەۆ ءمالىم ەتتى، دەپ حابارلايدى قازاقپارات.
«660 لاۋازىمدى تۇلعا ەسەلىك ايىپپۇلدارعا تارتىلدى. تەك ەكى جىلدا وسىنداي ايىپپۇلداردا ەسەلەپ تولەتۋدەن بيۋدجەتكە 6 ميلليارد تەڭگە ءتۇستى. سىبايلاس جەمقورلىققا جول بەرگەنى ءۇشىن 924 ادامعا قاتىستى مۇلىكتىك تاركىلەۋ جازاسى قولدانىلدى جانە 1200- ءى مەملەكەتتىك قىزمەتتە جۇمىس ىستەۋدەن ءومىر بويىنا شەتتەتىلدى»، - دەدى شپەكبايەۆ.
سونىمەن قاتار زاڭنامانى ىزگىلەندىرۋ ناتيجەسىندە قازاقستان دۇنيەجۇزىلىك تۇرمە رەيتينگىندە وڭتايلى كورسەتكىشتەرگە قول جەتكىزدى.
«1996 -جىلى قازاقستان تۇرمەدە وتىرعانداردىڭ سانى بويىنشا ا ق ش پەن رەسەيدەن كەيىن ءۇشىنشى ورىندا بولدى. 20 جىلدان استام ۋاقىت ءوتىپ، وسى رەتتە قۇقىقتىق جۇيەگە ەنگىزىلگەن وزگەرىستەرگە بايلانىستى قازاقستان 3-تەن 62- ورىنعا ورنالاستى»، - دەدى اگەنتتىك باسشىسىنىڭ ورىنباسارى.
ونىڭ سوزىنە قاراعاندا، وسى جىلدارى ا ق ش ەكىنشى ورىنعا جىلجىسا، ر ف تەك ونىنشى ورىنعا جوعارىلادى. بۇل ءوز كەزەگىندە قازاقستاندا ماڭىزدى قۇقىقتىق رەفورمالار جۇرگەندىگىن بايقاتادى.
ايتا كەتەيىك، بۇگىنگى وتىرىسقا الەمنىڭ 24 ەلىنەن 50-دەن استام شەتەلدىك دەلەگاتسيالاردىڭ وكىلدەرى قاتىسۋدا.
اۆتور: رۋسلان عابباسوۆ
