الماتىدا 12 مىڭ ورىندىق مۇز سارايى مەرزىمىنەن 3 اي بۇرىن پايدالانۋعا بەرىلدى - فوتو
12 مىڭ ورىندى مۇز سارايى الدىندا ولاردى «نۇر وتان» پارتياسىنىڭ الماتى قالالىق فيليالى، الاتاۋ اۋدانى اكىمدىگى، 28- بۇكىل الەمدىك قىسقى ۋنيۆەرسيادانى دايىنداۋ جانە وتكىزۋ جونىندەگى ديرەكتسيا وكىلدەرى، ءتيىستى قالالىق باسقارما باسشىلارى جانە ب ا ق وكىلدەرى قارسى الدى.
ق ر پارلامەنتى ءماجىلىسى ءتوراعاسىنىڭ ورىنباسارى، «نۇر وتان» پارتياسىنىڭ ماجىلىستەگى فراكسياسىنىڭ جەتەكشىسى گۇلميرا ەسىمبايەۆا 28- بۇكىل الەمدىك قىسقى ۋنيۆەرسيادانى دايىنداۋ جانە وتكىزۋ جونىندەگى ديرەكسيا جەتەكشىسى نايل نۇروۆتان ۋنيۆەرسياداعا قانشا ەلدىڭ قاتىساتىندىعىن سۇرادى.
«ازىرگە 64 ەل الدىن الا ءوتىنىم بەرىپ قويدى. ەندى، الەمدەگى ەكونوميكالىق داعدارىسقا بايلانىستى بۇل سان ءالى وزگەرۋى مۇمكىن. ءبىراق، سوعان قاراماستان، ءبىز كەم دەگەندە 50-52 ەلدەن 3 مىڭنان اسا سپورتشى قاتىسادى دەگەن ۇمىتتەمىز. ايتپەسە، ءبىز تەحنيكالىق تۇرعىدا 64 ەلدىڭ دەلەگاتسياسىن جانە 5 مىڭ سپورتشىنى قابىلداۋعا ساقاداي دايىنبىز، - دەدى ن. نۇروۆ. - كەم دەگەندە 30 مىڭ تۋريست كەلەدى دەپ جوسپارلاعانبىز. بۇل جەردە ءبىز ءوزىمىزدىڭ ىشكى تۋريزمگە، ياعني وتانداستارىمىزعا كوپ ءۇمىت ارتىپ وتىرمىز».
ءوز كەزەگىندە ولگا شيشيگينا مۇمكىندىگى شەكتەۋلى جانداردىڭ مۇز سارايىنا كەلۋىنە قانداي جاعداي جاسالعاندىعىن سۇرادى.
«12 مىڭ ورىندى مۇز سارايىنىڭ سىرتقى باسپالداقتارىندا ارنايى قۇرىلعىلار ورناتىلعان. سولار ارقىلى ولار ستاديونعا كوتەرىلىپ، سپورتتىق شارالاردى تاماشالاي الادى. ال سارايدىڭ ىشكى جاعىندا ارنايى جەدەل ساتىلار ورناتىلعان»، - دەپ جاۋاپ بەردى ن. نۇروۆ.
وسىدان كەيىن دەپۋتاتتار مۇز سارايىنىڭ ىشىنە ەنىپ، باسپالداقپەن تريبۋناعا كوتەرىلدى. مۇز ايدىنى، ونىڭ ورتاسىندا، ءدال شاتىردىڭ استىنا ورناتىلعان، ءتورت باعىتقا قاراعان الىپ ءتورت بۇرىشتى LED- ەكران جانە ەكى دەڭگەيلى تريبۋناداعى سارى-كوك ءتۇستى سۋ جاڭا ورىندىقتار كوز تارتادى.
«مۇز سارايى ءوز شىعىنىن ءوزى وتەي الاتىن دارەجەگە قاشان شىعادى؟» - دەپ سۇرادى گ. ەسىمبايەۆا.
«الداعى 2017-جىلى، ۋنيۆەرسيادا نىساندارىن كۇتۋگە كەتكەن شىعىننىڭ 30 پايىزىن وسى نىساندارداعى كوممەرتسيالىق قىزمەتتەر، ياعني نارىق ارقىلى وتەۋدى جوسپارلاپ وتىرمىز. بۇل كورسەتكىشتى 2018-جىلى - 50 پايىزعا، ال 2019-جىلى - 70 پايىزعا جەتكىزۋدى الدىمىزعا مىندەت ەتىپ قويدىق. ەندى مۇز سارايى، مۇز ارەناسى ولار قالاي بولعاندا دا قىمبات، كۇردەلى ينجەنەرلىك جەلىسى بار نىساندار عوي.
سوندىقتان ولاردى كۇتىپ ۇستاۋعا ءبارىبىر مەملەكەت تاراپىنان قارجىلىق قولداۋ قاجەت. بۇل جەردە شىعىننىڭ 30 پايىزى مەملەكەت تاراپىنان، ال 70 پايىزى نارىق ارقىلى وتەلىپ وتىرسا، نۇر ۇستىنە نۇر بولار ەدى. ويتكەنى، الەم ەلدەرىنە وسىنداي ارا-قاتىناس ساقتالادى»، - دەپ جاۋاپ بەردى بۇل سۇراققا الماتى قالاسىنىڭ سپورت قۇرىلىمدارى ديرەكسياسىنىڭ باسشىسى سەرگەي اپەنكو.
سونىمەن قاتار، سەرگەي لەونيدوۆيچ، 12 مىڭ ورىندى مۇز سارايىندا بيىلدىڭ وزىندە ءار ءتۇرلى سپورتتىق شارالار وتكىزىلەتىندىگىن جەتكىزدى.
«ءبىز بيىل مۇز سارايىندا جىل سوڭىنا دەيىن 8 سپورتتىق شارا وتكىزۋدى جوسپارلاپ قويدىق. ال 2017-جىلى مۇندا 28 سپورتتىق شارا وتكىزىلەتىن بولادى»، - دەدى س. اپەنكو.
ايتا كەتەلىك، 12 مىڭ ورىندى مۇز سارايى «قايرات» ميني- فۋتبول كلۋبىنىڭ، سونداي-اق، الماتى قالاسىنىڭ قازاقستان بىرىنشىلىگىندە ونەر كورسەتەتىن باسكەتبول جانە ۆولەيبول كلۋبتارىنىڭ وزىندىك الاڭىنا اينالادى. سونىمەن، قاتار قالاداعى بالالار جانە جاسوسپىرىمدەر سپورت مەكتەپتەرىنىڭ وقۋشىلارى مۇندا سپورتپەن تەگىن شۇعىلدانا الادى. ياعني، مۇز سارايى كوپ اتقارىمدىق امبەباپ كەشەنگە اينالادى.
بۇدان كەيىن دەپۋتاتتار مۇز سارايىنىڭ ىرگەسىندە ورنالاسقان ءجۇزۋ باسسەينىن جانە 300 ورىندى جاتتىعۋ مۇز ايدىنىن تاماشالادى.
كەزدەسۋ سوڭىندا دەپۋتاتتار ءوز ريزاشىلىقتارىن ءبىلدىرىپ، قوس ديرەكسيانىڭ جۇمىسىنا ساتتىلىك تىلەدى.
ايتا كەتەلىك، 12 مىڭ ورىندى مۇز سارايى - قازاقستانداعى ەڭ الىپ سپورتتىق نىسان. ونىڭ قۇرىلىسىنا 44,3 ميلليارد تەڭگە جۇمسالعان. باستى مەردىگەر - «س ك بازيس» ج ش س.
رەسمي اشىلۋ ءراسىمى الداعى تامىز ايىنىڭ سوڭىنا جوسپارلانىپ وتىر. وعان ەلباسى ن. نازاربايەۆ قاتىسادى دەپ كۇتىلۋدە.
