بيىل شەتەلدەن كەلگەن 11 مىڭعا جۋىق قازاق قازاقستان ازاماتتىعىن الدى

«جىل باسىنان بەرى كورشى ەلدەردەن تاريحي وتانىنا ورالعان 10,7 مىڭنان استام ەتنيكالىق قازاق قازاقستان ازاماتتىعىن الدى. جاڭا ازاماتتاردىڭ كوپشىلىگى ءبىزدىڭ رەسپۋبليكامىزعا وزبەكستاننان كەلگەن - %48,5. سونىمەن قاتار ق ح ر - %36، موڭعوليا - %6,2، تۇرىكمەنستان - %5,4، رەسەي فەدەراتسياسى - %1,1، يران - %0,5 جانە باسقا ەلدەردەن كەلگەن»، دەلىنگەن حابارلامادا.

ەلىمىزگە كەلگەندەر نەگىزىنەن اقمولا (%27)، ماڭعىستاۋ (%14) جانە جامبىل (%9) وبلىستارىندا، سونداي-اق نۇر- سۇلتان (%8,9) جانە شىمكەنت (%8,5) قالالارىندا قونىستاندى.

ايتا كەتەرلىگى، بۇگىنگى كۇنى (1991 -جىلدان باستاپ) 307,3 مىڭ وتباسى نەمەسە 1,046 ميلليون ەتنيكالىق قازاق تاريحي وتانىنا ورالىپ، ورالمان مارتەبەسىن الدى.

«قازاقستاندا ورالمان مارتەبەسىن العان ەتنيكالىق قازاقتارعا جەڭىلدەتىلگەن تۇردە ازاماتتىق الۋ ءۇشىن قولايلى جاعدايلار جاسالدى. بۇل مارتەبە ءبىر جىلعا جارامدى. مارتەبەنى ۇزارتۋ ورالمان مارتەبەسى توقتاتىلعان كۇننەن باستاپ ءۇش ايدان اسپايتىن مەرزىمگە ءوتىنىش بەرگەن كەزدە جەڭىلدەتىلگەن تارتىپپەن ازاماتتىق الۋ ءۇشىن عانا كوزدەلەدى»، - دەدى ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى احمادي سارباسوۆ.

بۇل رەتتە، ول كەيبىر ورالمانداردىڭ ۇسىنىلعان ۋاقىت ىشىندە جەڭىلدەتىلگەن تارتىپپەن قازاقستان ازاماتتىعىن الماعان جانە مۇنداي مۇمكىندىكتەن ايىرىلعانىن اتاپ ءوتتى.

«وسىعان بايلانىستى قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆ مۇنداي ورالماندارعا مارتەبەسىن جەڭىلدەتىلگەن تارتىپپەن الۋدى 2019 -جىلدىڭ 31 -جەلتوقسانىنا دەيىن ۇزارتۋ تۋرالى شەشىم قابىلدادى. وسىلايشا، مارتەبەسىن ۇزارتپاعان ورالماندار ونى ىستەۋ ءۇشىن جەرگىلىكتى اتقارۋشى ورگاندارعا جۇگىنە الادى جانە قازاقستان ازاماتتىعىن جەڭىلدەتىلگەن تارتىپپەن الۋ ءۇشىن ىشكى ىستەر ورگاندارىنا قۇجاتتاردى تاپسىرا الادى»، - دەدى احمادي سارباسوۆ.

26 -تامىزداعى جاعداي بويىنشا اكسيا شەڭبەرىندە ەل بويىنشا ورالمان مارتەبەسى 5789 ادامدا ۇزارتىلدى، ونىڭ 4909 ى قازاقستان ازاماتتىعىن الۋعا قۇجاتتارىن تاپسىردى.