بيىل سامارا - شىمكەنت تاسجولىندا 11 شەتەلدىك قازا تاپقان

اقتوبە وبلىستىق پوليتسيا دەپارتامەنتى الىس جولعا شىعىپ، جۇك جانە جولاۋشى تاسىمالدايتىندار ءۇشىن ەڭ ءقاۋىپتى جولدى اتادى. سامارا- شىمكەنت تاسجولىندا تەك شەتەلدىكتەر مەرت بولىپ جاتىر. سەبەبى جولعا شىققاندار تىنىقپايدى، جىلدامدىقتى اسىرادى.

«كولىك قۇرالىن باسقاراتىندار ۇيىقتاپ كەتىپ جاتىر. بۇگىن ءبىز ولاردى توقتاتىپ، قاۋىپتى جەرلەردى بەلگىلەپ، ءتۇسىندىرۋ جۇمىستارىن جۇرگىزدىك. جىل باسىنان بەرى 11 ادام تاسجولدا قايتىس بولدى. ولاردىڭ ءبارى شەتەل ازاماتتارى»، - دەدى وبلىستىق پ د باستىعىنىڭ ءبىرىنشى ورىنباسارى ابزال شوتانوۆ.

ايتا كەتەيىك، جىل باسىنان بەرى رەسپۋبليكالىق ماڭىزى بار جولداردا 69 جول-كولىك وقيعاسى تىركەلگەن. جول اپاتى كەزىندە 26 ادام قازا بولىپ، 120 ادام جاراقات العان. ال سامارا- شىمكەنت تراسساسىندا 39 جول-كولىك وقيعاسى تىركەلىپ، 11 ادام مەرت بولدى جانە 66 ادام جاراقاتتاندى. جۇرگىزۋشىلەردىڭ كوبى ۇيىقتاپ كەتەدى نەمەسە قارسى باعىتقا شىعادى.

«اقتوبە وبلىسىنىڭ اۋماعىندا «قاۋىپسىز جول» جەدەل-پروفيلاكتيكالىق شاراسى اياسىندا «جولدا قابىلداۋ» اكسياسى ءوتتى. شەتەل ازاماتتارىن پ د باستىعىنىڭ ورىنباسارى ابزال شوتانوۆ جانە اكىمشىلىك پوليتسيا باسقارماسى، جەرگىلىكتى پوليتسيا قىزمەتى باسقارماسى، «قازاۆتوجول» قىزمەتكەرلەرى قابىلدادى. مەديتسينا قىزمەتكەرلەرى جۇرگىزۋشىلەردىڭ دەنساۋلىعان تەكسەردى. الىس جولعا شىققان شەتەلدىكتەردى جول ساپاسى، جول بەلگىلەرىن ورناتۋ سۇراقتارى مازالايدى ەكەن. ال پوليتسيا قىزمەتكەرلەرى جۇرگىزۋشىلەر ءۇشىن ەڭ قاۋىپتى اۋماقتاردى كارتادان كورسەتىلىپ، دەمالىس ورىندارى تۋرالى اقپارات بەردى»، - دەپ حابارلادى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

ايتا كەتەيىك، قابىلداۋ كەزىندە داستارقان جايىلىپ، شەتەلدىك جولاۋشىلارعا باۋىرساق پەن كوجە ۇسىنىلدى.