بەكبولات تىلەۋحان 11 بالانىڭ اكەسى ەكەنىن جاسىرماي ايتتى
ول تەحنولوگيا دامىعان زاماندا رۋحاني جاعىنان السىرەپ بارا جاتقانىمىزدى ايتىپ كۇيىندى، دەپ حابارلايدى Stan.kz.
«كىشكەنتاي كەزىمىزدە اكەمىز كەلگەن سوڭ عانا ءبارىمىز وتىرىپ تاماق ىشەتىنبىز. ول وتىرماي، تاماققا قول سۇقپايتىنبىز. اكەي كەلەتىن، كەنجەسىن شاقىرىپ الىپ ءتاتتى جەرىنەن تۋراپ بەرەتىن. استا- توك تاماق جوق ەدى. تاماقتىڭ از بولۋىنىڭ وزىندە بەرەكە، جاقسىلىق بار ەكەن. ونىڭ بارلىعى ءوتتى كەتتى. مەندە ءوزى اللاعا شۇكىر 11 بالا بار. كىشكەنتايلارى مۇلدەم كىشكەنتاي، ۇلكەندەرى ۇلكەن»، - دەپ اعىنان جارىلعان بەكبولات تىلەۋحانعا جيىندا وتىرعاندار قوشەمەت كورسەتتى.
قوعام قايراتكەرى ۇلكەن بالالارىنا قاتال بولعانىن، الايدا جاسى كەلگەن سايىن جۇمساق بولىپ باراتىنىن ايتتى.
«ءبىراق نەگىزى اسا جۇمساق بولماعان جاقسى. ويتكەنى اكەمىز بىزگە جۇمساق بولعان جوق، ودان جامان بولعان جوقپىز. كىشكەنتاي كەزىمىزدەن جۇمىسقا سالدى، تاڭەرتەڭنەن جىبىرلاپ جۇرەتىنبىز. ترەنيروۆكاعا جىبەرسە باقىتتىسىڭ، جىبەرمەسە قالدىڭ»، - دەيدى ول.
بەكبولات تىلەۋحان بالالارىن ەسكى داستۇرمەن تاربيەلەگىسى كەلەتىنىن، الايدا وعان زاماننىڭ مۇمكىنشىلىك بەرمەيتىنىن تىلگە تيەك ەتتى.
ايتا كەتەيىك، جۋىردا بەكبولات تىلەۋحاننىڭ ۇلدى بولعانى بەلگىلى بولدى. سونداي- اق، قوعام قايراتكەرى 2015 -جىلى قىزدى بولعان ەدى.
