نۇر-سۇلتاندا 11، 14 جانە 15 جاستاعى ءۇش جاس ءوسپىرىم مەكتەپكە ەندى باردى
«تۇرمىس» جەدەل-الدىن الۋ شاراسى اياسىندا سارىارقا اۋداندىق پوليتسيا ءبولىمىنىڭ ۋچاسكەلىك ينسپەكتورى وزىنە جۇكتەلگەن اۋماقتى تەكسەرۋ بارىسىندا ۇزاق ۋاقىت بويى قۇجاتتارى بولماعان وتباسىن انىقتاعان.
«38 جاستاعى ايەل - 11,14 جانە 15 جاستاعى كامەلەتكە تولماعان ءۇش بالانىڭ اناسى، ولار نۇر-سۇلتان قالاسىنا ەكى اي بۇرىن كوشىپ كەلگەن. كوشىپ كەلگەنگە دەيىن، ولار قوستاناي وبلىسىندا تۇرعان. ايەل ءوزىنىڭ قۇجاتى جوقتىعىنان بالالارى تۋعاندا دا ولارعا كۋالىك الماعان. تەكسەرۋ بارىسىندا يۋۆەنالدى پوليتسيا ينسپەكتورلارى ءۇش بالانىڭ دا مەكتەپكە مۇلدەم بارماعانىن جانە تۋۋ تۋرالى كۋالىگى بولماعانىن انىقتادى»، - دەلىنگەن نۇر-سۇلتان قالالىق پوليتسيا دەپارتامەنتىنىڭ حابارلاماسىندا.
پوليتسيا ينسپەكتورىنىڭ ايتۋىنشا، ايەل ءوز بالالارىن تاربيەلەۋدەن جالتارىپ، ولارعا ءتيىستى كوڭىل بولمەگەن.
اۋداندىق يۋۆەنالدى پوليتسيا ينسپەكتورى نۇر-سۇلتان قالاسىنىڭ ءبىلىم باسقارماسىمەن بىرلەسىپ، ءۇش بالانى مەديتسينالىق تەكسەرۋدەن وتكىزدى جانە مەكتەپكە ورنالاستىردى. ولارعا پسيحولوگيالىق كومەك كورسەتىلىپ جاتىر. «قورعاۋ- استانا» جەكە قورىنىڭ قولداۋىمەن جاقىندا جاسوسپىرىمدەر العاشقى قۇجاتتارىن الادى.
پوليتسيا قىزمەتكەرلەرى بۇل وتباسىمەن پروفيلاكتيكالىق جۇمىستار جۇرگىزۋدە.
نۇر-سۇلتان قالاسى پوليتسيا دەپارتامەنتى يۋۆەنالدىق پوليتسيا ءبولىمىنىڭ باستىعى نەللي دوسجانوۆانىڭ سوزىنشە، بالالاردىڭ اناسى كامەلەتكە تولماعان بالالاردىڭ قۇقىقتارى مەن مۇددەلەرىن قورعاۋ، تاربيەلەۋ جانە وقىتۋ مىندەتتەرىن ورىنداماعانى ءۇشىن اكىمشىلىك جاۋاپكەرشىلىككە تارتىلدى.
