زورلانعان قىز 10-قاباتتان سەكىرگەن: پاۆلوداردىڭ ءۇش تۇرعىنىنا ۇكىم شىقتى
اتالعان ءىس وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا جابىق جاعدايدا قارالدى.
پاۆلودار وبلىسىنىڭ 19، 22 جانە 24 جاستاعى ءۇش تۇرعىنىنا 16 جاستاعى قىزدى زورلادى دەگەن ايىپ تاعىلدى. بارلىعى دا ەرتىس اۋدانىنىڭ تۋماسى.
سوت شەشىمىمەن 19 جاستاعى ايىپتالۋشى قىزدى زورلاعانى ءۇشىن 15 جىل 6 ايعا باس بوستاندىعىنان ايىرىلدى. ول ءومىر بويىنا پەداگوگيكالىق قىزمەتپەن اينالىسا المايدى جانە كامەلەتكە تولماعاندارمەن جۇمىس ىستەۋگە قۇقى جوق. سونداي-اق سوتتالۋشىدان جابىرلەنۋشىگە مورالدىق زياننىڭ وتەماقىسى رەتىندە 8 ميلليون تەڭگە ءوندىرىلىپ الىنادى.
قالعان ەكى ايىپتالۋشى ق ر قىلمىستىق كودەكسىنىڭ 434-بابى (قىلمىس تۋرالى حابارلاماۋ) بويىنشا كىنالى دەپ تانىلدى. ولار ءتورت جىلعا باس بوستاندىعىنان ايىرىلدى. جازالارىن قاۋىپسىزدىگى ورتاشا قىلمىستىق-اتقارۋ جۇيەسى مەكەمەسىندە وتەيدى. ۇكىم كۇشىنە ەنگەنگە دەيىن «قاماۋدا ۇستاۋ» تۇرىندەگى بۇلتارتپاۋ شاراسى وزگەرىسسىز قالدى.
«س. جانە ك. -عا قاتىستى بالاما جازا تاعايىنداۋ جانە بۇلتارتپاۋ شارالارىن قاراستىرا وتىرىپ، سوت ولاردىڭ تۇزەلۋى قوعامنان وقشاۋلانعان جاعدايدا عانا مۇمكىن دەپ شەشتى. قىز سەكىرىپ كەتتى. سىزدەر ەشتەڭە بولماعانداي قىلمىس ورنىنان قاشىپ كەتتىڭىزدەر. كىنانى ءىشىنارا مويىنداساڭىز دا، جەدەل جاردەم شاقىرعان جوقسىز. كومەك بولعان جوق. بارلىق ءىس-ارەكەتتەرىڭىز وسىنداي جازاعا اكەپ سوقتىردى»، - دەدى وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ تورەشىسى باقىت نۇرلانوۆ.
ۇكىم زاڭدى كۇشىنە ەنگەن جوق.
ەسكە سالا كەتەيىك، بىلتىرعى جىلدىڭ شىلدە ايىندا 16 جاستاعى قىز بالا تۋعان كۇنگە بارىپ، وتىرىستان كەيىن ءوزىنىڭ اپكەسىنە ۇيىنە قونۋعا شىققان. جولدا اداسىپ، اپكەسىنىڭ تانىستارىن كەزدەستىرگەن. ولار وعان تاكسي شاقىرىپ ۇيگە جەتكىزەمىز دەپ ۋادە بەرگەن. الايدا ءۇش جىگىت جاس ءوسپىرىم قىزدى الداپ، پاتەرگە كىرگىزگەن. جاس ءوسپىرىم قىز زورلانعان. كەيىن ول 10- قاباتتان سەكىرىپ كەتكەن. اعاشتاردىڭ ۇستىنە قۇلاعاندىقتان امان قالعان، الايدا قاتتى زارداپ شەككەن. بىرنەشە اي بويى اۋرۋحانادا جاتتى. ەكى كۇدىكتى بىلتىرعى جىلدىڭ شىلدە ايىندا، ال ءۇشىنشى كۇدىكتى قاڭتاردا قاماۋعا الىندى.
