تەكەلىدە جۇكتى بوپ قالعان 10-سىنىپ وقۋشىسىنىڭ ءىسىن پوليتسيا تەرگەپ جاتىر
جۇكتى بولعان وقۋشى قىز تەكەلى قالاسىنداعى №5-مەكتەپتىڭ 10-سىنىبىندا وقيدى. قازىر ول بالاسىن الدىرتىپ تاستاپتى.
جەتىسۋ وبلىستىق ءبىلىم باسقارمانداعىلار بالانىڭ تولىق وتباسىنان شىققانىن جەتكىزدى.
«تەكەلى قالالىق پوليتسيا ءبولىمى وسى ءىس بويىنشا تەرگەۋ امالدارىن جۇرگىزىپ جاتىر. سونىڭ ناتيجەسىندە زاڭدى شارالار قابىلدانادى»، - دەدى تەكەلىدەگى №5-مەكتەپتىڭ ديرەكتورى جانار جاقىپبەكوۆا.
ال قالعان جۇكتى بولعان ەكى وقۋشىنىڭ ءبىرى پانفيلوۆ اۋدانىنىڭ ءۇشارال اۋىلىنداعى مەكتەپتە 9-سىنىپتا، ەكىنشىسى سارقان قالاسىنداعى №1-مەكتەپ- گيمنازيادا 10-سىنىپتا وقيدى.
ەكى وقۋشى قىزدىڭ قۇرساعىنا بالا بىتكەلى ءۇش ايدان اسقان. ەكىقابات وقۋشىلار مەكتەپكە كەلىپ، ساباعىن وقىپ ءجۇر.
«بالاسىنىڭ ءومىرى جانە بالاسىنىڭ قاۋىپسىزدىگى ءۇشىن ءاربىر اتا-انا جاۋاپتى ەكەنىن ۇمىتپاۋ كەرەك. بالانىڭ كىممەن قانداي قارىم قاتىناستا بولعانىن، ونىڭ جانە دوستارىنىڭ كىم ەكەندىگىن، كەشكى ۋاقىتتا الەۋمەتتىك جەلىدە نەمەسە باسقا جەردە كىممەن بايلانىسىپ وتىر، سودان كەيىن بالانىڭ مىنەز- قۇلقىنا دا باسا نازار اۋدارىپ وتىرۋ كەرەك»، - دەيدى جەتىسۋ وبلىستىق ءبىلىم باسقارماسىنىڭ تاربيە ءىسى جونىندەگى باس مامانى رۋسلان ارسلانوۆ.
ءبىلىم باسقارماسىنداعىلار جالپى وقۋشىلاردىڭ وسىنداي كەلەڭسىز جايتتارعا تاپ بولىپ جاتقانى جاسىرىن ساۋالناما، ءتۇرلى پسيحولوگيالىق تەست ارقىلى انىقتالاتىنىن ايتادى.
ەستەرىڭىزگە سالا كەتەيىك، ەرتە جۇكتىلىك بويىنشا وقۋشىلار اراسىندا ءتۇسىندىرۋ جۇمىستارىن جۇرگىزگەن ءدال وسى تەكەلى قالاسىنداعى №8-مەكتەپتىڭ باسى داۋعا قالعان بولاتىن.
سەبەبى شارانى ۇيىمداستىرۋشىلار بالالارعا جەزوكشەلەرگە بەرىلەتىن اقىل-كەڭەس جازىلعان بروشيۋرانى تاراتىپ بەرگەن.
مۇنى كورگەن وقۋشىلاردىڭ اتا-انالارى جاعاسىن ۇستاپ، شۋ كوتەردى.
وسى داۋدان كەيىن مەكتەپتىڭ تاربيە ءىسى جونىندەگى ورىنباسارى سوگىس الدى، ال جەزوكشەلەرگە ارنالعان نۇسقاۋلىقتى وقۋشىلارعا تاراتىپ بەرگەن اۋرۋحانا پسيحولوگى جۇمىستان كەتكەنىن حابارلاعان بولاتىنبىز.