قازاقستاندا 10 ادامنىڭ ۇشەۋى عانا قارجىلىق جاعدايىنا قاناعاتتانادى

نۇر- سۇلتان. قازاقپارات - 10 قازاقستاندىقتىڭ ۇشەۋى عانا ءوزىنىڭ قارجىلىق جاعدايىنا تولىق قاناعاتتانادى. مۇنداي دەرەكتى ranking.kz پورتالى ۇسىندى، دەپ حابارلايدى قازاقپارات ءتىلشىسى.

جىل سايىن ناۋرىز ايىندا وتكىزىلەتىن حالىقتىڭ ءومىر ساپاسىن زەرتتەۋگە سايكەس، قارجىلىق جاعدايىنا تولىقتاي قاناعاتتاناتىن قازاقستاندىقتاردىڭ ۇلەسى ەكىنشى جىل قاتارىنان قىسقارىپ كەلەدى. ءبىر جىل بۇرىن مۇنداي رەسپوندەنتتەردىڭ ۇلەسى 40,2 پايىز بولسا، بيىل 32,1 پايىزدى قۇراپ وتىر.

دەگەنمەن، قارجىلىق جاعدايىنا جارتىلاي قاناعاتتاناتىنداردىڭ ۇلەسى جىل ىشىندە 56,3-تەن 64 پايىزعا دەيىن وسكەن. ال قارجىلىق جاعدايىنا قاناعاتتانبايتىن رەسپوندەنتتەر ۇلەسى (%0,6) جىل ىشىندە وزگەرىسسىز قالىپ وتىر. ساۋالعا جاۋاپ بەرۋگە قينالعانداردىڭ ۇلەسى 3,3 پايىزدى قۇرايدى. وتباسىنىڭ ەكونوميكالىق جاعدايىنا تولىقتاي قاناعاتتاناتىن رەسپوندەنتتەر ۇلەسى دە جىل ىشىندە 44,1-دەن 34,7 پايىزعا ازايعان. جارتىلاي قاناعاتتاناتىندار ۇلەسى 52,8-دەن 63 پايىزعا وسكەن. ال وتباسىنىڭ ەكونوميكالىق جاعدايىنا قاناعاتتانبايتىن رەسپوندەنتتەر ۇلەسى جىل ىشىندە 1,1-دەن 0,5 پايىزعا تومەندەسە، رەسپوندەنتتەردىڭ 1,8 پايىزى ساۋالعا جاۋاپ بەرۋگە قينالعان.

تۇرعىلىقتى جەردى الىپ قاراعاندا، قالالىقتارعا (%30,6) قاراعاندا اۋىل تۇرعىندارى (34,8) قارجىلىق جاعدايىنا تولىق قاناعاتتانادى. قارجىلىق جاعدايىنا قاناعاتتانبايتىنداردىڭ اراسىندا دا اۋىل تۇرعىندارىنا (0,4) قاراعاندا قالالىقتار (0,7) باسىم. سونىمەن قاتار ايەلدەرگە (%29,5) قاراعاندا قارجىلىق جاعدايىنا تولىق قاناعاتتاناتىن ەرلەردىڭ (%35,9) ۇلەسى كوپ. ءبىر قىزىعى قارجىلىق جاعدايىنا قاناعاتتانبايتىن ەرلەر مەن ايەلدەردىڭ ۇلەسى تەڭ - 0,6 پايىز.

اۆتور: مارلان جيەمباي