قويدىڭ نەبارى %10 ءىن ەكسپورتقا تىرىلەي ساتۋعا رۇقسات بەرىلەدى
مۇنداي شارا نە ءۇشىن ەنگىزىلدى؟
جىل باسىنان بەرى قازاقستاندا قويدىڭ سانى 7 ميلليون ءبىر جۇزگە كوبەيدى. وسىلايشا ەلدەگى ۇساق مالدىڭ جالپى سانى 27 ميلليون جانە ءجۇز مىڭعا جەتتى. بۇل ىشكى نارىقتى قوي ەتىمەن تولىق قامتۋعا جەتەدى. دەسە دە، بيىل ەلدىڭ كەي وڭىرلەرىندەگى قۋاڭشىلىق جانە جەم- ءشوپتىڭ قىمباتتاۋىنا بايلانىستى شوپاندار مال باسىن ازايتۋعا باسىمدىق بەرۋى مۇمكىن. اسىرەسە شەتەلگە تىرىلەي ساتىلۋى ىقتيمال. وسىنىڭ الدىن الۋ ءۇشىن ماماندار ۇساق مالدى شەتەلگە تىرىلەي ساتۋعا شەكتەۋ ەنگىزىپ وتىر.
باستاماعا كەيبىر شوپاندار قارسى. ايتۋىنشا، پاندەميادان كەيىن نەگىزگى يمپورتەرلەرمەن بايلانىس ءالى تولىق قالىپقا كەلگەن جوق. اۋە تاسىمالى دا ەكى ەسە قىمباتتادى. مۇنىڭ ۇستىنە قوي ەتىن وڭدەيتىن زاۋىتتار ەلدىڭ بارلىق وڭىرىندە جۇمىس ىستەمەيدى. سوندىقتان جەرگىلىكتى شوپاندار مالىن وتكىزەتىن جەر تاپپاي قارجىلىق قيىندىققا تاپ بولۋى مۇمكىن دەپ سانايدى.
تاراپتاردى تىڭداي كەلە ۆەدومستۆوارالىق كوميسسيا كۇزگە دەيىن قوي ەكسپورتىنا كۆوتا بەرۋ مەحانيزمىن جاساۋعا كىرىستى.
الماسبەك سادىربايەۆ، ۇلتتىق مال شارۋاشىلىعى قاۋىمداستىعىنىڭ ءتوراعاسى:
- بۇل ەتتىڭ باعاسىن تۇراقتاندىرۋعا كومەكتەسەدى. ەگەر دە بىزدەن مال كەتىپ قالسا قىمباتتاعاننىڭ كوكەسى سوندا بولادى. كۆوتانى الىپ شىعارامىن دەگەن ادامنىڭ مالدارىن تەكسەرەمىز. وندا ناقتى مال بار ما، مالىنىڭ قانشاسىن ساتۋعا شىعارىپ جاتىر. قازىر شارۋالار قالىپ قالماسىن. ولارعا مۇمكىنشىلىك بەرەمىز. قازىر قولىنداعى جاس مال بار عوي، بيىلعى ءتول، سونى ساتسىن. ال انالىق باستى ساقتاپ قالۋدىڭ امالى بىزدىكى.
ايتا كەتەيىك، جىل سايىن رەسپۋبليكادا 172 مىڭ توننادان استام قوي ەتى وندىرىلەدى. بۇل ىشكى نارىقتى تولىق قامتۋعا جەتەدى. ال شەت ەلدەرگە بيىل ءتورت ايدىڭ وزىندە 538 توننا ەت ەكسپورتتالدى. قازاقستاندىق قويدىڭ ەتىن نەگىزىنەن بىرىككەن اراب امىرلىكتەرى، وزبەكستان، باحرەين جانە رەسەي ەلدەرى يمپورتتايدى.
www.24.kz
