قازاقپارات كۇنتىزبەسى: 10- ناۋرىز
ەستە قالار وقيعالار
1932-جىلى وڭتۇستىك قازاقستان وبلىسى قۇرىلدى. 1962 -جىلى 3- مامىردان 1992-جىلى 6- شىلدەگە دەيىن شىمكەنت وبلىسى دەپ اتالعان. 1992 -جىلى وبلىسقا بۇرىنعى وڭتۇستىك قازاقستان اتاۋى قايتارىلدى. 2018-جىلدان تۇركىستان وبلىسى دەپ اتالادى. وبلىس ورتالىعى - تۇركىستان قالاسى.
1932 -جىلى اقتوبە وبلىسى قۇرىلدى. ونىڭ قۇرامىنا ورىنبور، قوستاناي، قىزىلوردا وبلىستارىنىڭ ءبىرقاتار اۋداندارى كىردى. اقتوبە وبلىسى تەڭدەسسىز مينەرالدى-شيكىزات بازاسىن يەلەنىپ جاتىر.
وبلىس اۋماعىندا قازاقستاننىڭ كومىرسۋتەكتى شيكىزاتىنىڭ (مۇناي، گاز جانە گاز كوندەنساتى) %10 بارلانعان قورى جانە بولجامدى رەسۋرستارىنىڭ %30، سونداي-اق رەسپۋبليكاداعى جالپى قوردان وتاندىق حرومنىڭ بارلىق قورى، نيكەل - %55، تيتان - %40، فوسفور - %34، مىرىش - %4,7، مىس - %3,6، اليۋمينيي - %2، كومىردىڭ - %1,4 جيناقتالعان. وبلىس ورتالىعى - اقتوبە قالاسى.
2010 -جىلى سەمەيدىڭ جاڭا تاريحتى قۇجاتتاندىرۋ ورتالىعىنىڭ قىزمەتكەرلەرى ءازىلحان نۇرشايىقوۆتىڭ (1922-2011) وسىدان 60 جىلداي بۇرىن مايداننان جازىلعان بىرەگەي حاتىن تاپتى. مۇراعاتتان حابارلاعانداي، ولەڭمەن جازىلعان حات «مايداننان جازىلعان حاتتار» قۇجاتتار توپتاماسىنان تابىلىپ وتىر.
«بىرەگەي جانە قۇندى حاتتى ءبىزدىڭ جەرلەسىمىز، جازۋشى، سوعىس ارداگەرى ءازىلحان نۇرشايىقوۆ 1944-جىلى بەلارۋس مايدانىندا شايقاسىپ جۇرگەن جىلدارى جارما اۋداندىق گازەتىندەگى ارىپتەستەرىنە جولداعان. ولەڭمەن جازىلعان حاتىن ول «ءبىز بەرلينگە بارامىز!» دەپ اتاعان.
اۋداندىق گازەت قىزمەتكەرلەرى ساقتاۋعا تاپسىرعان بۇل قۇندى مۇرا كەڭەس ءداۋىرىنىڭ تۇسىندا ۇزاق جىلدار بويى جارما اۋداندىق مۇراعاتىندا ساقتالىپ كەلگەن، كەيىننەن ول سەمەيدىڭ جاڭا تاريحتى قۇجاتتاندىرۋ ورتالىعىنا كەلىپ تۇسكەن.
2010 -جىلى قازاقستان مەن تاجىكستاننىڭ مادەني جانە ادەبي بايلانىستارىنا ارنالعان دۋشانبەدە «پامير» جۋرنالىنىڭ ارنايى شىعارىلىمى جارىق كوردى، وندا قازاقستاننىڭ تانىمال جازۋشىلارى مەن اقىندارىنىڭ شىعارمالارىنان، ولەڭدەرى مەن پۋبليتسيستيكاسىنان ۇزىندىلەر ۇسىنىلدى.
2011 -جىلى «ءبىر ەل - ءبىر كىتاپ» اكسياسىنىڭ ۇيىمداستىرۋ كوميتەتىنىڭ شەشىمىمەن 2011 -جىلى كوپشىلىكتىڭ وقۋى ءۇشىن جۇسىپبەك ايماۋىتوۆتىڭ «اقبىلەك» رومانى تاڭدالدى.
2012 -جىلى ازەربايجان پرەزيدەنتى يلحام اليەۆ ازەربايجاننىڭ تۇركى تىلدەس مەملەكەتتەرمەن بايلانىسىن نىعايتۋعا قوسقان ۇلەسى ءۇشىن دۇيسەن قوراباي ۇلى قاسەيىنوۆتى «دوستلۋگ» وردەنىمەن ماراپاتتاۋ تۋرالى وكىمگە قول قويدى. دۇيسەن قاسەيىنوۆ - تۇركى تىلدەس ەلدەر مەن حالىقتاردىڭ مادەنيەتى سالاسىنداعى ىنتىماقتاستىقتى نىعايتۋ جانە دامىتۋ ماقساتىندا قۇرىلعان تۇركسويدىڭ باس حاتشىسى.
2014 -جىلى قازاقستاندىق ايمان ساعاتوۆا ۇلىبريتانيانىڭ ولدەرشوت قالاسىندا «Kazakhsha» تەرى كوركەمدىك ستۋدياسىن اشتى. ونىڭ جۇمىستارىندا سارمات، ساق تايپالارىنىڭ، كوشپەندىلەر مادەنيەتىنىڭ ەلەمەنتتەرى كورىنىس تاپقان.
2015 -جىلى ريگا تاريحى مۇراجايىنىڭ زالىندا نۇرسۇلتان نازاربايەۆتىڭ «G- Global. XXI عاسىرداعى الەم» لاتىش تىلىندەگى العاشقى كىتابى رەسمي تانىستىرىلدى.
2016 -جىلى فرانتسۋزدىق «Airbus Defence and Space « كومپانياسى مەن «عالام» ج ش س قازاقستانعا عارىش اپپاراتتارى ءۇشىن كۇن داتچيكتەرىن ءوندىرۋ تەحنولوگياسىن ەنگىزۋگە كىرىستى.
2016 -جىلى تانىمال شوكولاتە Nikolya-نىڭ بىرەگەي جىلجىمالى شوكولاد مۋزەيى العاش رەت استاناعا كەلدى. ول كورمەگە ارناپ قازاقستانعا ارنالعان تۋىندىلار توپتاماسىن دايىنداپ اكەلدى.
بۇل - كونە زەرگەرلىك بۇيىمدار، سونداي-اق قازاقستان اۋماعىندا تۇرىپ جاتقان حالىقتاردىڭ باس كيىمدەرى. ولاردىڭ بارلىعى الماتىدا قازاقستاندىق شوكولادتان جاسالعان. ءتۇپ نۇسقالارى ق ر ورتالىق مەملەكەتتىك مۇراجايىنىڭ قورىندا ساقتالىپ وتىر.
2017 -جىلى ريو-دە-جانەيرودا قوڭىر بەلبەۋلەر بويىنشا الەم چەمپيونى ارمانجان رۋزاحۋنوۆ قازاقستان جانە ورتالىق ازيا تاريحىندا العاش رەت برازيليالىق دجيۋ-دجيتسۋدان قارا بەلبەۋ يەگەرى اتاندى.
2018 -جىلى قازاقستان رەسپۋبليكاسىنىڭ ازاماتتارى ءۇشىن بىرىككەن اراب امىرلىكتەرىنە كىرۋ ۆيزالارى الىنىپ تاستالدى. 2017-جىلى ق ر جانە ب ا ءا ازاماتتارىنىڭ ءوزارا ۆيزاسىز ساپارلاۋى تۋرالى حاتتاماعا قول قويىلعان بولاتىن.
2019 -جىلى سولت-لەيك-سيتي قالاسىندا وتكەن الەم كۋبوگىندا ەكاتەرينا ايدوۆا ەل رەكوردىن جاڭارتتى. 1000 مەترگە جارىسۋدان 1.13.7 ۋاقىت كورسەتكىشىن كورسەتتى. بۇل - قازاقستاندىق سپورتشىنىڭ ەڭ ۇزدىك ناتيجەسى ءارى قازاقستان رەكوردى.
2019 -جىلى سلوۆەنيادا جۇزۋدەن الەم چەمپيوناتى مەن وليمپيادا ويىندارىنا ىرىكتەۋ ساناتىنا جاتاتىن حالىقارالىق تۋرنير ءوتتى. دميتري بالاندين 50 جانە 200 مەترگە براسس ادىسىمەن جۇزۋدەن چەمپيون اتاندى.
2020 -جىلى الەمگە ايگىلى قازاقستاندىق ءانشى ديماش قۇدايبەرگەننىڭ ورىنداۋىنداعى جاڭا قىتايلىق سەريالدىڭ ساۋندترەگى قىتايداعى QQ MUSIC پلاتفورماسىندا ءبىرىنشى ورىنعا يە بولدى.