14:44, 30 - قازان 2018 | GMT +5
يندونەزياداعى ۇشاق اپاتى: 10 ادامنىڭ دەنەسى تابىلدى
استانا. قازاقپارات - Boeing اپاتىنان قازا تاپقانداردىڭ مۇردەلەرى تاۋلىك بويى ىزدەستىرىلىپ جاتىر. قۇتقارۋشىلارعا ءتيىستى تاپسىرمانى يندونەزيا پرەزيدەنتى دجوكو ۆيدودو جۇكتەدى.
ەلدىڭ توتەنشە جاعدايلار بويىنشا ۇلتتىق اگەنتتىگىنىڭ حابارلاۋىنشا، ىزدەستىرۋ جۇمىستارى ياۆا ارالىندا جۇرگىزىلۋدە. ازىرگە ۇشاقتىڭ قيراندىلارى مەن بىرنەشە جولاۋشىنىڭ دەنەسى عانا تابىلعان.
بۇگىن پرەزيدەنت اۋە اپاتىنان قازا تاپقانداردىڭ وتباسىلارىمەن كەزدەستى. قايعىلى وقيعاعا بايلانىستى كوڭىل ايتتى. ەسكە سالايىق، ۇشاقتىڭ بورتىندا 189 ادام بولعان. 8 ەكيپاج مۇشەسى جانە 181 جولاۋشى. قايعىلى اپاتتان ءتىرى قالعاندار جوق. قۇتقارۋشىلار ازىرگە سۋدان 10 ادامنىڭ دەنەسىن تاپتى.
www.24.kz