دانيار ەلەۋسىنوۆ 10 ميلليون تەڭگەنى سال اۋرۋىنا ۇشىراعان مۇگەدەك بالالارعا اۋدارادى
بۇل تۋرالى بۇگىن دانيار مەن ونىڭ اكەسى، جەكە باپكەرى، قازاقستاننىڭ ەڭبەك سىڭىرگەن جاتتىقتىرۋشىسى مارات ەلەۋسىنوۆتى قابىلداپ، قۇرمەت كورسەتكەن وبلىس اكىمى التاي كولگىنوۆ ءمالىم ەتتى.
ءوڭىر باسشىسىنىڭ اتاپ وتكەنىندەي، ەلىمىزدە سپورتقا، سونىڭ ىشىندە بوكسقا مەملەكەت تاراپىنان ايرىقشا كوڭىل ءبولىنىپ كەلەدى. قازاقستان سپورتشىلارىنىڭ ريو وليمپياداسىنداعى تابىس- جەتىستىكتەرى - سونىڭ ايقىن كورىنىسى.
«مەملەكەت باسشىسى مەن قازاقستان حالقىنىڭ سەنىمىن اقتاعاندار قاتارىندا اق جايىقتان تۇلەپ ۇشقان دانيار ەلەۋسىنوۆتىڭ بولۋى - باتىس قازاقستاندىقتار ءۇشىن ەرەكشە ماقتانىش. دانيار جاسوسپىرىمدەر اراسىندا الەم چەمپيونى اتانعان كەزدە ەلباسى ءوزى قابىلداپ، قۇرمەت كورسەتكەن بولاتىن. ەندى، مىنە، داڭقتى بوكسشىمىز سول ءۇمىت بيىگىنەن كورىنىپ، وليمپ شىڭىنا قول جەتكىزىپ وتىر. بۇدان بىلاي دا دانياردىڭ ءىزباسارلارىن كوپتەپ تاربيەلەۋ ءۇشىن ونىڭ وزىمەن، اكەسىمەن، قازاقستان بوكس فەدەراتسياسى وكىلدەرىمەن اقىلداسا وتىرىپ، جاڭادان اشىلاتىن سارايدان ارنايى ورتالىق اشۋدى ۇيعاردىق. وندا ءۇش- ءتورت رينگ ورناتىلىپ، بالالاردىڭ جاتتىعۋى ءۇشىن بارلىق جاعداي جاسالاتىن بولادى»، دەدى اكىم.
التاي كولگىنوۆ د. ەلەۋسىنوۆ پەن ونىڭ اكەسى ءارى باپكەرى مارات ەلەۋسىنوۆتىڭ ءارقايسىسىنا 10 ميلليون تەڭگەنىڭ سەرتيفيكاتىن تابىس ەتتى. دانيار سول بويدا العىسىن ءبىلدىرىپ، وسى قارجىنى سال اۋرۋىنا ۇشىراعان مۇگەدەك بالالارعا كومەك رەتىندە «بايتەرەك» قورىنا اۋداراتىنىن جەتكىزدى.
قۇرمەتتى مەيمان اكەسىمەن بىرگە بۇدان كەيىن تۋعان جەرى قازتالوۆ اۋدانىندا بولىپ، كەزدەسۋلەر وتكىزەدى. سونداي- اق 10 - قىركۇيەكتە قالا كۇنىنە وراي ورالدا وتەتىن ۆەلوشەرۋگە قاتىسپاقشى.
«ءبىزدى وسىلايشا قارسى الىپ، قۇرمەتتەپ جاتقان جەرلەستەرىمەن ريزامىن. بۇدان بىلاي دا اۋەسقوي بوكس بولا ما، الدە كاسىپقوي بوكس بولا ما، قايسىسىندا بولسىن، ەل سەنىمىن اقتاي بەرۋگە تىرىسامىن. كاسىپقوي بوكسقا اۋىساتىنىم جونىندە حابارلار جاريالانىپ، سۇراقتار قويىلىپ جاتىر. بۇعان بايلانىستى ايتارىم، ۇسىنىس بارشىلىق. ءبىراق ءبىز ءالى شەشكەن جوقپىز»، دەدى دانيار ەلەۋسىنوۆ قازاقپارات تىلشىسىنە.
