سەرىك احمەتوۆ پەن 10 سوتتالۋشىنىڭ قىلمىستىق جازاسى جەڭىلدەتىلدى
بۇل تۋرالى «قازاقپاراتتىڭ» وڭىردەگى ءتىلشىسى حابارلادى.
«الدىن الا تەرگەۋ بارىسىندا جانە باستاپقى ساتى سوتى بارىسىندا سوت ۇكىمىن جويۋعا مۇمكىندىك بەرەتىندەي ق ر قىلمىستىق ءىس جۇرگىزۋ كودەكسىنىڭ ايتارلىقتاي بۇزىلۋى انىقتالعان جوق. دەگەنمەن، س. احمەتوۆتىڭ جالپى سوماسى 2,2 ميلليارد تەڭگەدەن استام سوماداعى شىعىندى تولىق كولەمدە قايتارۋىن ەسكەرە وتىرىپ، سوت القاسى سوتتالۋشى احمەتوۆكە، ايتجانوۆقا، ايمەنبەتوۆكە، قيسىقوۆقا، ابدىشەۆكە، ەسسەگە، مۇحامبەتوۆكە، تەلعارينگە، ىسقاقوۆقا، سماعۇلوۆقا، دارىبايەۆقا قاتىستى جازانى جەڭىلدەتۋگە بولادى دەپ سانايدى»، - دەدى قاراعاندى وبلىستىق سوتىنىڭ قىلمىستىق ىستەر بويىنشا اپەللياتسيالىق سوت القاسىنىڭ ءتوراعاسى راشيد نۇرماعامبەتوۆ قاۋلىنى جاريا ەتۋ بارىسىندا.
بۇعان قوسا اپەللياتسيالىق القا باستاپقى ساتى ۇكىمىن ك. مۇسايەۆقا، ا. جاكەنوۆكە جانە ب. اسقاروۆاعا قاتىستى وزگەرىسسىز قالدىرۋ تۋرالى شەشىم قابىلدادى.
سونىمەن قاتار س. احمەتوۆتىڭ جازا مەرزىمى 10 جىلدان 8 جىلعا دەيىن ازايتىلىپ، مۇلكى تاركىلەنۋمەن قاتار 5 جىلعا دەيىن مەملەكەتتىك ورگانداردا لاۋازىمدى قىزمەت اتقارۋ قۇقىعىنان ايىرۋ جازاسى كەسىلدى.
مۇنان بولەك، اپەللياتسيالىق القا ب. ابدىشەۆتىڭ جازا مەرزىمىن 5 تەن 3 جىلعا، م. سماعۇلوۆتىكىن 3 تەن 2 جىلعا، ا. تەلعاريندىكىن 4 تەن 3 جىلعا، ە. قيسىقوۆتىكىن 3 تەن 2 جىلعا، ا. ەسسەنىكىن 7 دەن 5 جىلعا، ب. ىسقاقوۆتىكىن 3,5 تەن 1,5 جىلعا، و. ايمەنبەتوۆتىكىن 3,5 تەن 2 جىلعا، ە. دارىمبەكوۆتىكىن 3 تەن 2 جىلعا قىسقارتتى.
ب. ايتجانوۆ پەن گ. مۇحامبەتوۆتىڭ شىنايى باس بوستاندىعىن ايىرۋ جازاسىن شارتتى تۇردە باس بوستاندىعىنان ايىرۋ جازاسىنا وزگەرتتى. وسىلايشا، اپەللياتسيالىق القا ولاردى بىردەن تۇتقىننان بوساتۋ تۋرالى شەشىم شىعاردى.
سونداي-اق مۇحامبەتوۆتىڭ، تەلعاريننىڭ جانە قيسىقوۆتىڭ مۇلكى تاركىلەنبەيتىن بولىپ شەشىلدى.
ايتا كەتەرلىگى، مەملەكەتتىك ايىپتاۋشى اپەللياتسيالىق قاۋلىمەن كەلىسەتىندىگىن ءمالىم ەتتى. «قاۋلى نەگىزدى ءارى زاڭدى. جازانى تاعايىنداۋ بارىسىندا جاعدايدى اۋىرلاتاتىن دا، جەڭىلدەتەتىن دە جايتتار، سونىمەن بىرگە شىعىننىڭ ءوز ەركىمەن قايتارىلۋى دا ەسكەرىلدى. جازانى جەڭىلدەتۋ بۇل سوتتىڭ اپەللياتسيالىق ساتىنىڭ قۇقىعى. ءبىز جازا شاراسىنىڭ جىكتەلۋىن ءارى تاعايىندالۋىن ءادىل دەپ سانايمىز»، - دەدى ب ا ق وكىلدەرىنە پروكۋرور ديار ءادىلوۆ.
اۆتور: مارلان جيەمباي
