اشىربەك سىعايدىڭ 10 پىكىرى
«تەاتر ونەرى ءۇشىن بۇگىن قارالى كۇن. اشىربەكتەي داڭقتى ۇلى، سىنشى ورتامىزدان كەتتى. بۇل ءبىر قابىرعامىز قۇلاپ تۇسكەنمەن بىردەي. قازاقتا اعا دوس، ءىنى دوس دەگەن بار. ول ماعان ءىنى دوس ەدى. ول تۋرالى ايتىلار ءسوز كوپ. ساعىنامىز. قايران، اشەكە! وزىمنەن كىشى ىنىلەرىم كەتىپ جاتقاندا، مىنا بىزدەردىڭ جاعدايىزدى ءتۇسىنىپ تۇرعان شىعارسىزدار. ول - مەن ءۇشىن ءتىرى. جۇرەگىمدە! تەاتر ونى ىزدەيدى»، - دەدى قازاقستاننىڭ حالىق ءارتىسى ءاسانالى ءاشىموۆ اقتىق ساپارعا شىعارىپ سالۋ كەزىندە.
وسى ورايدا، teatrlife.kz سايتى ازىرلەگەن اشىربەك سىعايدىڭ افوريزمگە تاتىرلىق 10 پىكىرىن بەرە كەتكەندى ءجون كوردىك.
اشىربەك سىعاي:
1. ءبىر عانا كوماندا بار، ول - قازاق، قازاقستان كومانداسى.
2. قازاقتىڭ جەرى كەڭ، قويناۋى قازىناعا باي. ءبىراق سول ۇلان-عايىر دالامىز بوس جاتىر. يگەرىلمەي، يەلەنبەي جاتقان بوس كەڭىستىك كوپ. سانىمىز از. وسى ولقىلىقتىڭ ورنىن قالايدا تولتىرۋ كەرەك، قازاققا شۇعىل تۇردە كوبەيۋ قاجەت.
3. حالىقتىڭ سانىن كوبەيتۋىمىز ءتيىس. ەگەر حالىقتىڭ سانى 20 ميلليونعا جەتسە، وندا قازاق حالقىنىڭ ءتىل ماسەلەسى مۇنداي وتكىر كۇيىندە ءبىرىنشى كەزەكتە تۇرماس ەدى.
4. قازاقتىڭ جۇرەگى توقتاماسىن، ونەردىڭ جۇرەگى توقتاماسىن دەپ وتىرعانىم سول. ونەرىن ءولتىرىپ العان قازاق ەل بولىپ وڭبايدى، ەلىنەن اينىپ قالعان جۇرەك - جۇرەك بوپ سوعىپ جارىتپايدى. ەكەۋى بولىنبەس ءبىر ءبۇتىن، تۇتاس دۇنيە دەپ ەسەپتەيمىن. ەندەشە، جۇرەگىمىز توقتاماسىن!
5. كلاسسيكاعا دۇرىستاپ مويىن بۇرا الماي جۇرگەندەردىڭ قادىرى قاشۋى مۇمكىن. ال كلاسسيكانىڭ قادىرى ەش ۋاقىتتا قاشپايدى. ويتكەنى، ول - كلاسسيكا. كلاسسيكا دەگەن - ماڭگىلىك تاعدىر تاپقان، ماڭگىلىك تاريح تاپقان رۋحاني دۇنيە.
6. قالىڭ كوپكە بىردەي جاعۋ قيىن نارسە. ول - وتە سيرەك بولاتىن پروتسەسس. بارلىعىنا بىردەي ۇناۋ دەگەن بولمايدى. ويتكەنى اركىمنىڭ وزىندىك «مەنى»، وزىندىك تالعامى، قيسىنى، قابىلداۋ جۇيەسى، قورىتۋ دەڭگەيى، مۇمكىندىگى بولادى.
7. ساحنادا، ەكراندا كىلەڭ شىڭكىلدەك، ۇساق اكتەرلەر كوبەيدى، ەكى يىعىنا ەكى كىسى مىنگەندەي فاكتۋرا جوق. كەسكىن كەلبەتى كەلىسكەن كەرميىقتارعا ءزارۋمىز. مايدا تارتىپ بارامىز. شىڭكىلدەپ، ەلپىلدەپ كەتتىك.
8. قاجىمۇقاندى ورتا بويلى، سيديعان جىگىتتەر وينايتىن بولىپ ءجۇر. قاماردى كورىپ قارنىڭ اشادى. نە داۋىس جوق، نە رۋح جوق. دەنە تۇرپاتى عانا ەمەس، قيمىلى، رۋحى كىشكەنتاي. قاراگوز بولىپ تولقىتىپ، قامار بولىپ جىلاتا المايدى، قىز جىبەك بولىپ ەگىلتىپ، ەڭلىك بولىپ ەلجىرەتە المايدى مەنى. مىنە، بارلىق تراگەديا وسىندا جاتىر.
9. شتامپ دەگەن - قازىر قازاق ساحناسىنىڭ نەگىزگى دەرتى. ول نە دەگەن ءسوز؟ ءبىر ىزدىلىك، سول باياعى ءبىر ۇقساستىق، اناۋ رولىندە دە، مىناۋ رولىندە دە قولى ەربەڭ- ەربەڭ، سول باياعى داۋىس، سول باياعى ءۇن، سول قيمىل، سول كۇلكى. ەش وزگەرىس جوق.
10. «وتەللونى» مۇحتار اۋەزوۆ كەرەمەت اۋدارعان. ال ەندى سونى قازاق ءتىلىنىڭ تابيعاتىنان، قۇنارىنان بەيماعلۇم رەجيسسەردىڭ ىڭعايىنا قاراپ، قايشى الا جۇگىرۋ، كۇزەپ سالۋ، تۇزەپ سالۋ - مەن مۇنى جاقسىلىقتىڭ نىشانى دەپ ويلامايمىن.
