اتامەكەن تۋعان جەرىنە 106 جاستاعى كەيۋانا 90 جىلدان كەيىن ورالدى

نۇر- سۇلتان. قازاقپارات - رەسەيدىڭ ورىنبور وبلىسىندا 90 جىل تۇرعان، 106 جاستاعى كەيۋانا نافيزا يسلامبەك قىزى ەندىگى عۇمىرىن تۋعان جەردە وتكىزگىسى كەلەدى.

ورالداعى حالىققا قىزمەت كورسەتۋ ورتالىعىنىڭ ماماندارى قوس عاسىردىڭ كۋاگەرىنە تاقاۋدا ۋاقىتشا تۇرۋعا رۇقسات قاعازىن تابىس ەتتى. اجەيدىڭ ەندىگى ارمانى قازاقستاننىڭ ازاماتتىعىن الۋ.

نافيزا جارىلعاپوۆا 1914 -جىلى جىمپيتى اۋدانىندا دۇنيەگە كەلىپتى. اكەسى يسلامبەك داۋلەت دارىعان جان ەكەن. وتكەن عاسىردىڭ 30 جىلدارى باي- قۇلاقتاردى قۋدالاۋ كەزىندە رەسەيگە قاشىپتى. سودان بەرى كورشى ەلدە. اشتىقتى، جوقتىقتى، سوعىستى دا كورىپتى. ادال ەڭبەگىنىڭ ارقاسىندا ەل قاتارىندا ءومىر ءسۇرىپ كەلەدى.

نافيزا جارىلعاپوۆا، 106 جاستاعى كەيۋانا:

- بالا شاعىمدا باي دەپ اكەلەرىمدى قۋىپ جىبەردى. سول ۋاقىتتا جاياۋ قاڭعىپ، ءبارىمىز كەتىپ قالدىق. ورىنبور وبلىسى، سامارا وبلىسى تۇرعان- جۇرگەن جەردە كورشىمەن دە ورىس بولسىن، قازاق بولسىن، تاتار بولسىن بارىمەن باقىتتى تۇردىم وزىمشە. ءبارى دە قۇرمەتتەدى. سول اللانىڭ بەرگەن جاسى بولار.

107 جاسقا قادام باسقان كەيۋانانىڭ تىلەگى - ەلدىڭ تىنىشتىعى، ۇرپاعىنىڭ اماندىعى. 2 ۇل، 3 قىزدان 24 نەمەرە، 49 شوبەرە سۇيگەن اجەي شوپشەگىنىڭ سانىن انىق بىلمەيدى.

نافيزا جارىلعاپوۆا، 106 جاستاعى تۇرعىن:

- وسىنداي جاسقا كەلەم دەپ ويلاعام دا جوق. اللا بەرگەسىن قايدا بارام. نەشە كۇن ءومىر بولسا دا ريزامىن. تەك اللادان جاتىپ- تۇرىپ سۇرايتىنىم، جاتقىزىپ تاستاما دەيمىن توسەككە. سوسىن ميىمدى اداستىرما ولگەنشە، بالالارىمدى كەلگەندە تانىپ تۇرۋعا دەپ سول ەكەۋىن دە سۇرايمىن.

نافيزا اجەمىز ەڭبەككە ەرتە ارالاسىپ، جاسىنان جۇمىسقا جەگىلىپتى. «بالا كەزىمىزدە ءبىر تىنىم تاپپايتىن ەدى. ۇزاق جاساۋىنىڭ ءبىر سىرى سول شىعار»، - دەيدى ۇل- قىزدارى. 14 جاسىندا اتامەكەننەن الىستاپ، 90 جىل جىراقتا جۇرگەن كەيۋانانىڭ جۇرەگىندە وتانعا ساعىنىش ءبىر باسىلماپتى.

ۇرقيا قىدىرنيازوۆا، قىزى:

- بىزدەر رەسەيدە تۇردىق. رەسەيدە گاز بار، ءبارى جاقسى بولعانىمەن جىمپيتى دەپ تۋعان جەرىن جاقسى دەپ ماقتاپ ايتىپ وتىرادى. بالالارى نەمەرەلەرى سىزگە قانداي جاقسىلىق جاساۋعا بولادى دەپ سۇراسا، قازاقستانعا بارساق دەپ اڭسايدى دا وتىرادى.

اجەيدىڭ ويى ورىندالدى. ورالدا تۇراتىن نەمەرەسى ونى بيىل كوشىرىپ الىپتى. 106 جاستاعى كەيۋانا كوشى- قون قىزمەتىنە قۇجات الۋعا ءوز اياعىمەن بارعاندا، ورتالىق قىزمەتكەرلەرىنىڭ تاڭدانىسىندا شەك بولماعان ەكەن.

جاننا تىركامانوۆا، حالىققا قىزمەت كورسەتۋ ورتالىعىنىڭ باس مامانى:

- ەڭ العاش حالىققا قىزمەت كورسەتۋ بويىنشا كوشى- قون بولىمىنە حابارلاما تاستاۋعا كەلگەن بولاتىن. مۇنداي جاستاعى ادام وتە سيرەك كەزدەسەدى. سوندىقتان ءبىز اجەيگە كومەكتەسىپ شەتەل ازاماتىنىڭ قازاقستانعا كەلگەنى جونىندە بەرىلەتىن انىقتاماسىن اكەلىپ بەردىك.

بۇگىن نافيزا اجەيدىڭ قولىنا ۋاقىتشا تۇرۋ قاعازى ءتيدى. ءوڭىردىڭ ەڭ ەگدە تۇرعىنىنىڭ ەندىگى ارمانى - قازاقستاننىڭ ازاماتتىعىن الۋ.

www.24.kz