جۇرەكتىڭ تازالىعىنا ءمان بەرۋ كەرەك: الماتىلىق كەيۋانا 105 جاسقا قالاي جەتكەنىن ايتتى
بۇل تۋرالى «الماتى» ارناسىنا سىلتەمە جاساپ Stan.kz حابارلايدى.
بيىل اسەمبالا اجەي 105 جاسقا تولادى. ول ءوزىنىڭ ەگدە جاسىنا قاراماستان، ازىلدەپ، ءتىپتى سەلفيگە ءتۇسۋ ءۇشىن قالاي كۇلۋ كەرەكتىگىن دە بىلەدى.
«ءبىز نە كورمەدىك؟ سۋ دا تابىلمايدى جۇتايىق دەسەك. ءبىراق اللا الىپ قالدى. اكە- شەشەم بار سوندا. ەدىگە دەگەن باتىردىڭ قىزىمىن. 12 جىل ەسكى وقۋ وقىدىم. قۇراندى وقىدىم، ءبارىن وقىدىم. ءسويتىپ اللاحۋ اكبار دەپ جەتتىك قوي» ، - دەيدى اسەمبالا مولدىبەكوۆا.
اسەمبالا مولدىبەكوۆا 1913 -جىلى كىشىگىرىم اۋىلدا تۇرىپ جاتقان ۇلكەن وتباسىندا دۇنيەگە كەلگەن. ول ءالى كۇنگە دەيىن ءوزىنىڭ اكەسى ەدىگە باتىردىڭ ۇرپاعى ەكەنىن ايتىپ ماقاتانادى. ۇلى وتان سوعىسى باستالعاندا، اسەمبالانى تەمىر جول قۇرىلىسىنا جىبەرگەن. ال كەيۋانانىڭ جەكە ومىرىندە مۇڭدى ءارى اۋىر تۇستارى كوپ. ونىڭ تۇڭعىشى دۇنيەگە كەلگەننەن كەيىن، ودان كەيىنگى بالالارى بىرىنەن سوڭ ءبىرى شەتىنەپ كەتكەن. وسىلايشا ايەل 5 بالاسىن جەر قوينىنا تاپسىرىپتى. قازىر ونىڭ 5 قىزى، ءبىر ۇلى بار. ولاردىڭ ەڭ ۇلكەن 85, ال كىشىسى 58 جاستا.
«تاماق جاعىن بۇل كىسى جاقسىلاپ تاڭداپ ىشەدى. اناۋ- مىناۋ ءبىر نارسەنى ىشە سالمايدى. ءشايدى دە سولاي. مەن ءشاي قۇيعاندا گازدىڭ قاسىندا تۇرامىن. ءسۇت تە ىستىق، ءشاي دا ىستىق. سوندا سونى قۇيىپ بەرىپ، اۋزىنا اپارعانشا ماعان «مىنا ءشايىڭ سۋىق» دەپ ەسكەرتۋ جاسايدى. سودان كەيىن بۇل كىسى ەتتى جاقسى كورەدى، قازى- قارتانى جاقسى كورەدى. بويىنداعى ەرەكشە قاسيەتى - كىسى جاتىرقامايدى. بار جاقسىلىقتى جاساعىسى كەلىپ تۇرادى» ، - دەيدى ونەرگۇل مولدىبەكوۆا.
اسەمبالا اجەي دەنساۋلىعىنا شاعىمدانبايدى. كەيدە عانا قۇلاعىم ەستىمەي قالادى، دەيدى.
كەيۋانا ناعىز قازاق رەتىندە ەتتى، اسىرەسە جىلقى ەتىن ءسۇيىپ جەيدى. ايتۋىنشا، ۇزاق جاساۋىنىڭ قۇپياسى جوق. باستىسى - جۇرەكتەگى يمان مەن ادالدىق، دەيدى اسەمبالا اجەي.
«مەن نەمەرەلەرىم مەن شوبەرەلەرىمە بارىنە ادال بولىڭدار دەپ ۇنەمى ايتىپ وتىرامىن. جۇرەكتىڭ تازالىعىنا ءمان بەرۋ كەرەك. ءدىنىمىز يسلام دا وسىنى ۇيرەتەدى. مەن بىرنەشە جىل مەدرەسەدە وقىدىم. سول ۋاقىتتىڭ ىشىندە قۇراندى مەڭگەردىم» ، - دەيدى اسەمبالا مولدىبەكوۆا.
كەيۋانانىڭ مەرەيتويى بىرنەشە كۇننەن كەيىن وتەتىن بولادى. ونى قۇتتىقتاۋعا 40 نەمەرەسى مەن 30 شوبەرەسى كەلەدى.
