شىلدەدەن باستاپ تابيعات قورعاۋ قىزمەتكەرلەرىنىڭ جالاقىسىنا 100 پايىز ۇستەمە قوسىلادى
استانا. قازاقپارات - بيىلعى 1-شىلدەدەن باستاپ قازاقستاننىڭ تابيعات قورعاۋ مەكەمەلەرى قىزمەتكەرلەرىنىڭ جالاقىسىنا %100 ۇستەمەاقى قوسىلادى.
ق ر ۇكىمەتى مەملەكەت باسشىسىنىڭ اتالعان سالادا ەڭبەك جاعدايىن جاقسارتۋ جونىندەگى تاپسىرماسىن ورىنداۋ اياسىندا ءتيىستى قاۋلى قابىلدادى، دەپ حابارلايدى قازاقپارات.
ۇكىمەت باسپا ءسوز قىزمەتىنىڭ مالىمەتىنشە، قۇجاتتا ادام ءومىرى مەن دەنساۋلىعىنا قاۋىپ توندىرەتىن جۇمىس ءۇشىن قوسىمشا اقى بەلگىلەۋ كوزدەلگەن.
ەڭبەك جاعدايلارى ەرەكشە قۇرىلىمداردىڭ قاتارىنا جانۋارلار دۇنيەسىن قورعاۋ، ورماندى قورعاۋ جانە قالپىنا كەلتىرۋ، مەملەكەتتىك ورمان قورعاۋ جانە ت. ب. مامانداندىرىلعان ۇيىمدار جاتادى.
ەندى قىزمەتكەرلەردىڭ ورتاشا جالاقىسى اتقاراتىن قىزمەتى مەن جۇمىس وتىلىنە بايلانىستى 101 مىڭنان 320 مىڭ تەڭگەگە دەيىن ۇلعايادى.
جالپى وسى سالادا 12876 قىزمەتكەردىڭ جالاقىسى كوتەرىلەدى.
بۇل شارا بىلىكتى كادرلاردىڭ تۇراقتاپ قالۋىنا جانە جالپى جۇمىستىڭ تارتىمدىلىعىن ارتتىرۋعا مۇمكىندىك بەرەدى.
