كەڭەس راقىشيەۆ بوكستان الەم چەمپيوناتىنىڭ جەڭىمپازدارىنا ءوز قاراجاتىنان 100 مىڭ دوللاردان بەرمەك
«بوكس - ەلىمىزدەگى ەڭ تانىمال ءارى ەڭ ناتيجەلى سپورت ءتۇرى. سوندىقتان، تاشكەنتتەگى الەم چەمپيوناتى جانكۇيەرلەردىڭ ەرەكشە نازارىندا بولارى انىق. قازاقستان بوكس فەدەراتسياسى، باپكەرلەر جانە سپورتشىلاردىڭ وزدەرى الداعى دوداعا تياناقتى دايىندالۋ ءۇشىن بار كۇش- جىگەرىن جۇمسادى (.. .)
جىگىتتەرمىزدى ىنتالاندىرۋ ماقساتىندا، جەڭىمپازدار مەن جۇلدەگەرلەردى ءداستۇرلى تۇردە ءوز قاراجاتىم ەسەبىنەن قوسىمشا سىياقىمەن ماراپاتتايمىن. چەمپيوندارعا 100 مىڭ ا ق ش دوللارىنان قاراستىرىلعان.
بوكسشىلارعا ايتار باستى تىلەگىم - ەسىمدەرىڭىزدى تاريحتا قالدىرىڭىزدار. سىزدەرگە بۇكىل قازاقستان جانكۇيەر بولاتىنىن ۇمىتپاڭىزدار!» ، - دەپ كەلتىرەدى بوكس فەدەراتسياسى ك. راقىشيەۆتىڭ ءسوزىن.
سونداي- اق فەدەراتسيا باسشىسى قازاقستان سپورتشىلارىنا قولداۋ بىلدىرۋگە شاقىردى.
«دەمەۋ بولسا، ۇلتتىق قۇرامانىڭ بوكسشىلارى ايانىپ قالماسى انىق. بىرلىك بار جەردە - تىرلىك بار. بارلىعىمىز ءبىر جۇدىرىق بولىپ جۇمىلساق، الىنبايتىن قامال جوق. الەمدىك ارەنادا تاعى ءبىر مارتە ۇزدىك اتانۋ ءۇشىن قاۋقارىمىز جەتەدى»، - دەيدى ول.
ايتا كەتەيىك، بۇعان دەيىنگى الەم بىرىنشىلىگىندە قازاقستان قۇراماسى 2 التىن، 2 كۇمىس، 1 قولا جۇلدە يەلەنگەن بولاتىن.