رەسەي ۋكراينامەن شەكاراداعى اسكەرىن 100 پايىز سوعىسقا قوستى
قازىر رەسەي اسكەرىنىڭ بارلىق كۇشى ۋكراينا تەرريتورياسىندا ءجۇر. بۇل جايلى ا ق ش- تىڭ قورعانىس مينيسترلىگىنىڭ جوعارى شەندى شەنەۋنىكتەرى ايتتى، دەپ حابارلايدى CNN.
پەنتاگوننىڭ (ا ق ش- تىڭ قورعانىس مينيسترلىگى) مالىمەتىنشە، رەسەي ۋكرايناعا بارلىعى 625 زىمىران جىبەرگەن ەكەن. ال 7- ناۋرىز كۇنگى مالىمەت بويىنشا، رەسەي ون ەكى كۇننىڭ ىشىندە 600 زىمىران جىبەرگەن. پەنتاگوننىڭ مالىمەتىنشە، بۇل زىمىراندار - رەسەيدىڭ ۋكراينا شەكاراسىنا اكەپ قويعان زىمىرانداردىڭ بارلىعى. كوبى بەلارۋس جەرىنەن اتقىلاعان.
ا ق ش قورعانىس مينيسترلىگىنىڭ كەشەگى مالىمەتتەرىن الىپ قاراساق، رەسەيدىڭ سوعىستا جەتكەن جەتىستىگى از. ماسەلەن، ۋكرايناعا اۋە كۇشتەرى كوتەرىلىپ، زىمىراندارمەن قانشا اتقىلاسا دا ءالى كۇنگە دەيىن ۋكراينا اسپانىن وزىنە باعىندىرا المادى.
«ۋكراينا اسكەرىنىڭ تىكۇشاقتارى مەن ۇشاقتارى ەمىن-ەركىن ۇشىپ ءجۇر. پۆو جۇيەسى ءالى ىستەپ تۇر. رەسەي قارۋلى كۇشتەرى مۇنى دا الا المادى. كيەۆ تۇبىندەگى 64 شاقىرىمعا سوزىلعان تانك كولونناسى جىلجىعان جوق، سول كۇيى ءالى تۇر. سوعان قاراعاندا، جانارماي تاۋسىلىپ قالعان سىڭايلى. ودەسسا قالاسى ماڭىنا رەسەيدىڭ تەڭىز دەسانتى كەلەدى دەلىنگەن ەدى. ول دا كەلگەن جوق. كەلەدى دەگەن دە بەلگى جوق»، - دەپ تۇسىنىكتەمە بەرگەن پەنتاگون باسشىلارى.
«ۋكراينانىڭ ءالى كۇشى جەتكىلىكتى. اۋە قورعانىس رەسەيگە بەرە قويمايدى»، - دەدى بۇگىن ا ق ش قورعانىس مينيسترلىگى ماماندارى.
كەشە ۋكراينانىڭ قارۋلى كۇشتەرىنىڭ باس شتابى 46 مىڭ رەسەي جاۋىنگەرى «جوق بولدى» دەگەن ەدى. ياعني، ونىڭ ىشىندە 12 مىڭى قازا بولدى (8- ناۋرىز كۇنگى دەرەك). قالعانى - تۇتقىنعا تۇسكەندەر مەن جارالانعاندار. ال رەسەي ۋكراينامەن شەكاراعا بارلىعى 190 مىڭ اسكەر اكەپ ورنالاستىرعان ەدى.
بۇعان دەيىن ا ق ش- تىڭ بارلاۋ قىزمەتى پۋتيننىڭ بۇكىل اسكەرىنىڭ 75 پايىزىن ۋكراينا شەكاراسىنا اكەلىپ ورنالاستىردى دەگەن. ياعني، رەسەيدىڭ بۇكىل 160 باتالونىنىڭ 120 سى ۋكراينا شەكاراسىنا اكەلىنگەن. شامامەن، بۇل دەگەنىمىز - 190 مىڭ جاۋىنگەر.
ەگەر وسى كۇشتىڭ ءبارى ۋكرايناعا كىرسە، وندا رەسەيدىڭ بۇكىل اسكەرىنىڭ 25 پايىزى عانا قالدى دەگەن ءسوز.
«قالعان اسكەردى دە ىسكە قوستى دەگەننىڭ وزىندە رەسەيدىڭ العاشقى باسىپ كىرگەن باسقىنشىلىعىنداي اسەر بولمايدى. ەكىنشىدەن، رەسەي قالعان اسكەرىن ىسكە قوسسا، وندا بۇكىل ارمياسىن السىرەتىپ الادى»، - دەپ تۇسىنىكتەمە بەرەدى ا ق ش بارلاۋ قىزمەتى.