گۋمانيتارلىق ءبىلىم سالاسىندا قازاق تىلىندەگى 100 وقۋلىق تانىستىرىلدى - فوتو

نۇر-سۇلتان. قازاقپارات - ق ر پرەزيدەنتى جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ كەڭەيتىلگەن ءماجىلىسى اياسىندا گۋمانيتارلىق ءبىلىم سالاسىندا قازاق تىلىندەگى 100 وقۋلىق تانىستىرىلدى، دەپ حابارلايدى قازاقپارات ءتىلشىسى.

«ۇلتتىق اۋدارما بيۋروسى» اتقارعان «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا اۋدارىلعان 100 وقۋلىقتىڭ ءارقايسىسى 10 مىڭ دانامەن باسىپ شىعارىلدى. قازاق تىلىنە اۋدارىلعان كىتاپتار بارلىق وقۋ ورىندارىنا، سونىڭ ىشىندە جەكە مەنشىك ۋنيۆەرسيتەتتەرگە دە تاراتىلدى.

«دۇنيەدەگى ەڭ وزىق وقۋ ورىندارىنىڭ باعدارلاماسىنا كىرگەن عىلىمي ادەبيەت، اكادەميالىق بەستسەللەر ەڭبەكتەر قازاق تىلىنە اۋدارىلدى. ولار بۇعان دەيىن الەمنىڭ ونداعان تىلىنە اۋدارىلىپ، ىلگەرى دامىعان قوعامداردا ميلليونداعان تيراجبەن تاراعان. ءبىزدىڭ دە وقىتۋشىلار مەن ستۋدەنتتەردىڭ وسىنداي مازمۇنعا قول جەتكىزۋى ۇلكەن ولجا. بۇل، قاجەت دەسەڭىزدەر، «بولاشاق» باعدارلاماسىنىڭ اۋقىمى كەڭ جالعاسى. «بولاشاق» باعدارلاماسىنىڭ ارقاسىندا ءبىزدىڭ 20 مىڭداي ستۋدەنتىمىز الەمنىڭ الدىڭعى قاتارلى ۋنيۆەرسيتەتتەرىنەن ءبىلىم الدى. ال ەندى ءوز ەلىمىزدە وقيتىن جارتى ميلليون قازاقستاندىق ستۋدەنت سول كەمبريدج، وكسفوردتىڭ، گارۆاردتىڭ ۇزدىك وقۋلىقتارىمەن قازاق تىلىندە ءبىلىم الۋعا مۇمكىندىك الدى»، - دەدى كەڭەيتىلگەن ءماجىلىس بارىسىندا ق ر مەملەكەتتىك حاتشىسى قىرىمبەك كوشەربايەۆ.

ول 100 جاڭا وقۋلىقتىڭ ارقاسىندا قوعامدىق سانا ءۇشىن اسا ماڭىزدى ءبىرقاتار گۋمانيتارلىق ءبىلىم سالاسىنىڭ مازمۇنى تۇبەگەيلى تۇردە جاڭارتىلعانىن باسا ايتتى.

«كوپ جاعدايدا ءالى دە تاپتىق، فورماتسيالىق، يدەولوگيالىق سيپاتتا باياندالىپ كەلگەن فيلوسوفيا، تاريح، الەۋمەتتانۋ، ساياساتتانۋ، زاڭ مەن قۇقىقتانۋ، جۋرناليستيكا، مادەنيەت جانە ونەرتانۋ، ءتىل ءبىلىمى، شىعىستانۋ، ادەبيەت تەورياسى، پەداگوگيكا جانە پسيحولوگيا سەكىلدى عىلىمدار ءپانارالىق، وركەنيەتتىك جانە گۋمانيستىك باعىتتاعى جاڭا مازمۇنعا يە بولدى»، - دەدى ول.

اۆتور: مارلان جيەمباي