ەلوردادا وكپەسى 100 پايىز زاقىمدانعان ناۋقاس جازىلىپ شىقتى
20 كۇن بويى رەانيماتسيادا بولعان اسحات وتىزبايەۆ دارىگەرلەردىڭ ارقاسىندا دەرتىنەن ايىعىپ، بۇگىن ۇيىنە شىعارىلدى، دەپ حابارلايدى قازاقپارات قالا اكىمدىگىنە سىلتەمە جاساپ.
«بۇگىن شىعارىپ جاتقان ناۋقاسىمىز اسحات وتىزبايەۆ 25- شىلدەدە اۋرۋحانامىزعا كەلىپ ءتۇستى. ءۇشىنشى كۇنى تىنىس الۋى قيىنداپ، جاعدايى ناشارلاپ كەتتى. سول كەزدە تاعى كومپيۋتەر توموگرافياسىنا ءتۇسىرىپ تەكسەردىك، وكپەسى 100 پايىز زاقىمدانىپ كەتكەن ەكەن. سوعان بايلانىستى ونى رەانيماتسيا بولىمىنە اۋىستىردىق. 20 كۇن بويى جانساقتاۋ بولىمىندە جاتىپ، جاعدايى جاقسارعان سوڭ بۇگىن ۇيىنە شىعارىپ سالدىق»، - دەدى 3№ كوپبەيىندى قالالىق اۋرۋحاناسىنىڭ پۋلمانولوگ-دارىگەرى ساپاركۇل بەردەشوۆا-ابىلدايەۆا.
دارىگەرلەردىڭ ايتۋىنشا، اسحاتتىڭ جاعدايىنىڭ تىم ناشارلاپ كەتۋىنە ونىڭ ۆاكسينا الماعانى سەبەپ بولعان.
«سەبەبى، ناۋقاستىڭ جاسىنا قاراماستان ەگەر ول ەكپە السا اۋرۋ جەڭىل وتەدى جانە ۆاكسيناتسيالانعاندار اراسىندا جانساقتاۋ بولىمىنە تۇسەتىندەر ساۋساقپەن سانارلىق»، دەيدى دارىگەرلەر.
«اۋرۋحاناعا تۇسكەن كەزدە جۇرە المايتىنمىن، ءتىپتى سويلەۋگە مۇرشام بولمادى. قازىر ءوزىم ءجۇرىپ-تۇرىپ، سويلەپ وتىرمىن. دارىگەرلەرگە العىسىم شەكسىز!» - دەيدى ناۋقاس اسحات وتىزبايەۆ.
ايتا كەتەيىك، كوروناۆيرۋس ينفەكسياسىن جەڭۋدىڭ جالعىز، ءتيىمدى جولى - ۆاكسيناتسيا ارقىلى ۇجىمدىق يممۋنيتەتتى دامىتۋ.