ⅩⅩعاسىردا 100 كۇنگە دەيىن ءومىر سۇرگەن مەملەكەتتەر
تاۋەلسىزدىگىنەن ايرىلعان ەلدىڭ حالقى ءاردايىم السىزدىگى ءۇشىن قۋدالاۋعا ۇشىراپ نە ءولىم جازاسىنا كەسىلگەن.
1905 -جىلى توڭكەرىستەن كەيىن رەسەيدىڭ ماسكەۋ گۋبەرنياسىندا قۇرىلعان ماركوۆ شارۋا رەسپۋبليكاسى 243 كۇن ءومىر ءسۇردى. 1918 -جىلعى ۇلى پولياك كوتەرىلىسىنەن كەيىن نەمىس اۋىلىنىڭ ءدىني قىزمەتكەرى قۇرعان شۆەنتەن مەملەكەتى 218 كۇن عانا ەگەمەندىگىن ساقتادى. 1918 -جىلى نەمىس كنيازى ۆيلگەلم فون ۋراح قۇرعان ليتۆا كورولدىگى تاۋەلسىزدىگى بار بولعانى 259 كۇنگە سوزىلعان.
ءبىرىنشى دۇنيەجۇزىلىك سوعىستان كەيىن ىدىراپ كەتكەن اۋستريا- ۆەنگريا مەملەكەتىنىڭ ورنىنا سلوۆاك سوۆەت رەسپۋبليكاسى، تارنوبجەگ، بانات، كومانچي، پرەكمۋرە، بارانيا- بايا سياقتى شاعىن مەملەكەتتەر دە قۇرىلدى. ءبىراق كوپ ۇزاماي ولار قالاي تەز قۇرىلعان بولسا، سولاي ءىز- ءتۇزسىز جوعالىپ كەتتى.
ءبىراق تومەندە ءبىز ولاردان دا از، ياعني 100 كۇنگە دەيىن عانا ءومىر سۇرگەن مەملەكەتتەر تۋرالى ايتامىز.
ارمەنيانىڭ تاۋلى رەسپۋبليكاسى - 78 كۇن
1920 -جىلعى كەلىسىم بويىنشا ارمەنيا مەن ءازىربايجان رەسپۋبليكاسى اراسىنداعى داۋلى ايماقتار - قاراباح، زانگەزۋر، ناحيچيەۆان - قىزىل ارميانىڭ باقىلاۋىنا ءوتتى. ءبىراق ارميانداردىڭ ءبارى بىردەي كەڭەسكە سەنگەن جوق. زانگەزۋردان شىققان اسكەري قولباسشى گارەگين نجدە قىزىلدارعا قارسى شىعىپ، پارتيزاندىق قوزعالىس ۇيىمداستىردى. ونىڭ ءار قيمىلى جەڭىسپەن اياقتالدى. ول ءوزىنىڭ بيلىگىن تەك زانگەزۋردا عانا ەمەس، قاراباقتىڭ جارتىسىندا تاۋلى ارمەنيا رەسپۋبليكاسىن قۇرا وتىرىپ ورناتتى. ءبىراق 78 كۇننەن كەيىن قىزىل ارميا اسكەرلەرى ونىڭ اسكەرىن تالقانداپ، كوتەرىلىستى باستى. گارەگين يرانعا قاشىپ ۇلگەردى.
قىرىم حالىق رەسپۋبليكاسى - 34 كۇن
1917 -جىلعى اقپان توڭكەرىسىنەن كەيىن قىرىم تاتارلارىنىڭ بەلسەندىلىگى ارتىپ، قىرىم تۇبەگىندە تاۋەلسىز مۇسىلمان مەملەكەتىن قۇرۋ تۋرالى شەشىم قابىلداندى. باحچيسارايدا وتكەن كونگرەسستە جاڭا مەملەكەت - قىرىم پارلامەنتتىك حالىق رەسپۋبليكاسى دەپ اتالدى. نومان چەلەبيدجيحان ونىڭ العاشقى پرەزيدەنتى بولىپ سايلاندى.
ءبىر قىزىعى، بۇل يسلام رەسپۋبليكاسىندا مەملەكەتتى شىركەۋدەن ءبولىپ، ايەلدەرگە سايلاۋ جانە سايلانۋ قۇقىعىن بەرۋ تۋرالى شەشىم قابىلدادى. ءبىراق كوپ ۇزاماي رەسمي مويىندالعان ۇكىمەتتى دە، كۇشتى ارمياسى بار رەسپۋبليكانى دا بولشيەۆيكتەر باسىپ الدى.
باۆار كەڭەس رەسپۋبليكاسى - 27 كۇن
1919 -جىلى گەرمانيا كورولى ليۋدۆيگ III ۆيتتەلسباح تاقتان تايعاننان كەيىن، بيلىكتى قولىنا العان كوممۋنيستەر ەۆگەنيي ليەۆيننىڭ باسشىلىعىمەن باۆاريادا كەڭەس رەسپۋبليكاسىن قۇردى. ۇكىمەت بانكتەردى باسىپ الدى، ال كاسىپورىندار مەن ۇيىمداردا جۇمىسشىلاردىڭ باقىلاۋى ورناتىلدى. توتەنشە كوميسسيا جانە قىزىل ارميا قۇرىلدى. وسى جىلدىڭ 29 - ساۋىرىندە نەمىس اسكەرلەرى باۆارياعا باسىپ كىرىپ، ميۋنحەن قالاسىن قانعا بويادى. ءۇش كۇندە مىڭعا جۋىق «قىزىلدار» اتىلدى.
24 ساعاتتان از ءومىر سۇرگەن كارپات ۋكرايناسى
كارپات ۋكرايناسى 1920 -جىلى چەحوسلوۆاكياعا اۆتونومدى تۇردە قوسىلدى. 1938 -جىلعى ميۋنحەن كەلىسىمى گيتلەردىڭ قولىن بايلادى. سوندىقتان دا ناتسيستەر سوتقا باسىپ كىرگەن كەزدە چەحوسلوۆاكيا رەسپۋبليكاسى جويىلدى. كارپات ۋكرايناسى 1939 -جىلى 15-ناۋرىزدا ءوزىن تاۋەلسىز مەملەكەت رەتىندە جاريالادى.
ۇكىمەت گيتلەرگە جاڭادان قۇرىلعان مەملەكەتتى گەرمانياعا قوسۋدى سۇراپ حات جىبەردى. ءبىراق رەيح بۇل شارتپەن كەلىسپەدى. ماجارلار كارپات ۋكرايناسىنا، ەگەر ول ۆەنگريانىڭ قۇرامىنا ەنبەسە، سوعىس جاريالايمىز دەپ مالىمدەدى. الايدا، شتاتتىڭ جاڭا باسشىلىعى ماجارلاردىڭ ۇسىنىسىمەن كەلىسپەي، 15 مىڭ ەرىكتى ارميامەن ءوز تاۋەلسىزدىگىن قورعاۋعا شەشىم قابىلدادى. كەلەسى كۇنى ۆەنگريا اسكەرى استانا حۋستتى، سودان كەيىن بۇكىل كارپات ۋكرايناسىن باسىپ الدى.
رەسەي دەموكراتيالىق فەدەراتيۆتىك رەسپۋبليكاسى
بىرنەشە ساعات قانا ءومىر سۇرگەن بۇل رەسپۋبليكانى 1917 -جىلى كورنيلوۆ كوتەرىلىسى باسىلعاننان كەيىن ۋاقىتشا ۇكىمەتتىڭ 5 ءمينيسترى جاريالادى. ولار كونستيتۋتسيانىڭ جوباسىن جاسادى. جاڭا ۇكىمەت رەسەيدى ەكى پالاتالى پارلامەنت پەن پرەزيدەنت باسقارۋى كەرەك دەپ كورسەتتى. ولار فرانسۋز جۇمىسشىلارىنىڭ «مارسەلەزاسىن» رەسمي ءانۇران رەتىندە قابىلدادى.
ءبىراق ارادا ءبىر كۇن وتپەي بولشيەۆيكتەر رەسەي دەموكراتيالىق فەدەراتيۆتىك رەسپۋبليكاسىن باسىپ الىپ، شەشىمنىڭ كۇشىن جويدى.
massaget.kz
