جاپونياداعى جەر سىلكىنىسى: 100 دەن استام ادام زارداپ شەكتى
اگەنتتىك تاراتقان اقپارتتارعا قاراعاندا، وسىعان دەيىن ءزىلزالانىڭ سالدارىنان 50 ادامنىڭ زارداپ شەككەنى تۋرالى ايتىلعان. زارداپ شەككەندەردىڭ باسىم بولىگى مياگي، فۋكۋسيما پرەفەكتۋرالارىنىڭ تۇرعىندارى.
بۇل ايماقتا جەراستى دۇمپۋلەرى باسقا وڭىرلەرمەن سالىستىرعاندا قاتتى سەزىلگەن. زارداپ شەككەندەردىڭ باسىم بولىگى جەراستى ءدۇمپۋى كەزىندە قۇلاپ، جاراقات الىپ، نەمەسە ءبىر جەرىن اۋىرتىپ العاندار.
ايتا كەتەيىك، سەنبى كۇنى كەشكىسىن تىنىق مۇحيتتا، جاپونيانىڭ فۋكۋسيما پرەفەكتۋراسىنىڭ سولتۇستىك-شىعىسىندا قۋاتتى جەر سىلكىنىسى بولدى. جاپونيانىڭ ۇلتتىق مەتەورولوگيا باسقارماسى الدىن جەر سىلكىنىسىنىڭ 7,1 ماگنيتۋدا شاماسىندا بولاتىنىن ەسكەرتكەن.
الايدا جەر سىلكىنىسىنىڭ قۋاتى 7,3 كە دەيىن باردى. جەراستى ءدۇمپۋى جاپونيانىڭ فۋكۋسيما مەن مياگي پرەفەكتۋرالارىندا جانە ەل استاناسىنىڭ ورتالىعىندا سەزىلگەن.
سونىمەن قاتار جەر سىلكىنىسىن ەلدىڭ سولتۇستىگى، سولتۇستىك-شىعىسى مەن جاپونيانىڭ ورتالىعىنداعى 10 نان استام پرەفەكتۋرا تۇرعىندارى سەزگەن.