قىتايلىق مەملەكەتتىك كومپانيالار باسشىلارى ورتاشا جىلىنا 100 مىڭ دوللار الادى

استانا. قازاقپارات - قىتايدىڭ مەملەكەتتىك كەڭەسى ەلدىڭ مەملەكەتتىك كاسىپورىندارىن باسقاراتىن تۇلعالاردىڭ جالاقى دەڭگەيى تۋرالى دەرەكتەردى جاريالادى، دەپ حابارلادى جەرگىلىكتى ب ا ق- قا سىلتەمە جاساپ «كوممەرسانت».

كورپوراتيۆتىك باسشىلىقتىڭ ءبىرقاتار وكىلدەرىنىڭ ەڭ كوپ جىلدىق تابىسى 1 ميلليون يۋاندى (144 مىڭ دوللار)، ەڭ ازى - 40-50 مىڭ يۋاندى قۇرايدى. ستاتيستيكاعا سايكەس مەملەكەتتىك سەكتور ديرەكتورلارى اراسىندا 15 ادام عانا ميلليوندىق تابىس الادى.

اتاپ ايتقاندا، بۇل توپقا China Merchants Group باسقارماسىنىڭ ءتوراعاسى لي تسزيانحۋن دا جاتادى. ونىڭ ءبىر جىلدىق جالاقىسى 1,2 ميلليون يۋاندى ($172,8 مىڭ) قۇرايدى. 40 شاقتى باسشى 800 مىڭ يۋان الاتىن بولىپ شىقتى.

ولار نەگىزىنەن، ەلەكترمەن جابدىقتاۋ سالاسىنداعى كاسىپورىنداردى باسقاراتىندار. قىتاي ۇكىمەتىنىڭ دەرەكتەرىنە سايكەس مەملەكەتتىك كومپانيالار ديرەكتوراتىنىڭ جىلدىق جالاقى دەڭگەيى 500-700 مىڭ يۋاندى (72-100 مىڭ دوللار) قۇرايدى.

جەرگىلىكتى شولۋشىلار اتاپ وتكەندەي، مەملەكەتتىك سەكتور بويىنشا جاريالانعان تابىس دەڭگەيى قىتايدىڭ ءبىرقاتار جەكە كومپانيالارىنىڭ باسشىلارىنا قاراعاندا، بىرنەشە ەسە تومەن بولىپ شىقتى.

ەسكە سالساق، Forbes باسىلىمى قاراشادا رەسەيلىك كومپانيالاردىڭ ەڭ كوپ تابىس تاباتىن باسشىلارىنىڭ جىل سايىنعى رەيتينگىن ۇسىندى. ءبىرىنشى ورىندا «گازپروم» باسشىسى الەكسەي ميللەر - - $17,7 ميلليون. «روسنەفتي» پرەزيدەنتى يگور سەچين - ەكىنشى ورىندا ($13 ميلليون). ءۇشىنشى ورىندا سبەربانك باسشىسى گەرمان گرەف ($11 ميلليون)، ءتورتىنشى - ونەكسيم توبىنىڭ باس ديرەكتورى دميتري رازۋموۆ، بەسىنشى - USM Advisors-تان يۆان سترەشينسكي - ولاردىڭ تابىسى - $10 ميلليون.