شىمكەنتتە نۇرسۇلتان ەسىمدى 100 بالا «نۇرسۇلتان اتا» ءانىن ورىندادى - فوتو، كەسكىن
بۇل دۋماندى ءان استانا كۇنىنە وراي ۇيىمداستىرىلعان شارا بارىسىندا ورىندالدى دەپ حابارلايدى NUR. KZ پورتالىنىڭ ايماقتاعى ءتىلشىسى.
وڭتۇستىك قازاقستان وبلىسى جۇرتشىلىعىنىڭ استانا كۇنىن تويلاۋدى باستاپ كەتكەنىنە بىرنەشە كۇن بولدى. ەلوردانىڭ كامەلەتتىك جاسقا تولاتىن ايتۋلى كۇنىنە وراي ءتۇرلى الەۋمەتتىك نىساندار اشىلىپ، ەل قۋانىشقا كەنەلۋدە.
وبلىس ورتالىعى شىمكەنتتە «جان جۇرەگىم - استانا!» سالتاناتتى ءىس- شاراسى ءوتتى. وعان وبلىس اكىمى بەيبىت اتامقۇلوۆ ارنايى قاتىسىپ، حالىقتى باس قالا - استانا كۇنىمەن قۇتتىقتادى.
«وسى شيرەك عاسىر ىشىندە ەلىمىزدىڭ 18 جىلدىق تاريحى - استانا اتاۋىمەن تىكەلەي بايلانىستى. تاۋەلسىز مەملەكەتىمىزدىڭ جاڭا استاناسىن قالىپتاستىرۋ - ەلىمىزدى بارىنشا نىعايتۋ جانە قارىشتى دامىتۋ جونىندەگى ساياسي ستراتەگياسىنىڭ جەمىسى. پرەزيدەنت پەن قازاقستاندىقتاردىڭ ەرىك- جىگەرىنىڭ ارقاسىندا الەمدەگى تاڭداۋلى استانالارمەن ساۋلەت جاعىنان بوي تەڭەستىرە الاتىن وسى زامانعى وزىق مەگاپوليس قالىپتاسىپ كەلەدى»، - دەدى ايماق باسشىسى ءوز قۇتتىقتاۋىندا.
مەرەكەلىك شارا بارىسىندا ءتۇرلى كونسەرتتىك قويىلىمدار قويىلىپ، جينالعان جۇرتشىلىق شات دۋمانعا كەنەلدى. سونىمەن قاتار «استاناعا ارناۋ» پوەتيكالىق كومپوزيتسياسى وقىلىپ، ساحناعا نۇرسۇلتان ەسىمدى 100 بالا شىعىپ، «نۇرسۇلتان اتا» ءانىن ورىندادى.
ءان ماتىنىندە «نۇرسۇلتان اتا، ۇزاق جىل جاسا، شارشاماي تالماي، جاساي بەر العا» دەگەن تىلەكتەر ايتىلدى.