ەلباسىنىڭ «100 قادام» يدەياسىن جۇزەگە اسىرۋعا بارلىق مەملەكەتتىك قىزمەتكەر اتسالىسۋى كەرەك - فوتو
بۇل تۋرالى كەشە ەلباسىنىڭ بەس ينستيتۋتسيونالدى رەفورماسىن جۇزەگە اسىرۋ ماسەلەلەرىنە ارنالعان وبلىس اكتيۆىنىڭ جيىنىندا ءوڭىر باسشىسى نۇرلان نوعايەۆ ءمالىم ەتتى.
«بۇل باعىتتاعى جۇمىستاردى تەك وبلىستىق ىشكى ساياسات باسقارماسى نە بولىمدەرى عانا ەمەس، كوپشىلىك بولىپ اتقارۋىمىز كەرەك. بۇدان ەشكىم تىس قالماعانى ءجون.
سوعان وراي اۋدان، قالا اكىمدەرىنە، باسقارما باسشىلارىنا كەڭ كولەمدى ءتۇسىندىرۋ جۇمىستارىن جۇرگىزۋگە تاپسىرما بەرىلەدى. وعان دەپۋتاتتار، قوعامدىق ۇيىم وكىلدەرى دە اتسالىساتىنىنا سەنەمىن.
ءتۇسىندىرۋ جۇمىستارى تەك ۇلت جوسپارىن وقىپ شىعۋ ەمەس، ناقتى مىسالدارمەن قامتىلۋى قاجەت. وعان اركىم ءوزىنىڭ ءومىر، ەڭبەك تاجىريبەسىنە بايلانىستى ۇسىنىستارىن ەنگىزسە، نۇر ۇستىنە نۇر. ءبىز ءاربىر ءىستى وسىلايشا كەڭەسىپ، بىرىگىپ اتقارساق، ەلىمىز دامۋدىڭ جاڭا ساتىسىنا كوتەرىلەرى انىق»، دەدى اكىم.
جيىندا بايانداما جاساعان وبلىس اكىمىنىڭ ورىنباسارى باقتيار ماكەن الدا تۇرعان باستى ماقسات- مىندەتتەرگە توقتالدى. ونىڭ ايتۋىنشا، الەمدە بولىپ جاتقان وزگەرىستەر ەشبىر مەملەكەتتى الاڭداتپاي قويمايتىنى ايدان انىق. ونى تەرەڭ تۇسىنە بىلگەن ەلباسىمىز «نۇرلى جول - بولاشاققا باستار جول» باعدارلاماسىن «100 ناقتى قادام» ۇلت جوسپارىمەن تولىقتىردى.
قازىرگى تاڭدا بۇكىل الەم جاڭا قاۋىپ- قاتەرلەرمەن، گەوساياسي كيكىلجىڭدەرمەن جانە الەمنىڭ مىقتى ەلدەرىنىڭ ءبىر- بىرىنە قوقان-لوقى كورسەتۋىمەن بەتپە-بەت كەلىپ وتىر. مىنە، وسى جاعدايدا ەلىمىزدىڭ ەكونوميكالىق قۋاتىنىڭ ارتۋى مەن ىشكى بىرلىگىمىزدىڭ مىزعىماس مىعىمدىعى اۋاداي قاجەت.
سوعان وراي بۇل قۇجاتتى ەلباسىنىڭ 100 ناقتى قادامىنىڭ لەيتموتيۆى دەپ اتاۋعا بولادى. قازاق ەلىنىڭ ورتاازيالىق ايماقتا ساياسي ءارى ەكونوميكالىق دەرجاۆاعا اينالۋى جانە پوستكەڭەستىك ايماقتا جەتەكشى، بىرىكتىرۋشى ەل بولۋى ەلباسى مەن قازاق حالقىنىڭ موينىنا زور مىندەتتەر جۇكتەپ وتىر.
نۇرسۇلتان ءابىش ۇلى نازاربايەۆتىڭ 100 قادامى - الەمنىڭ ەڭ دامىعان 30 ەلىنىڭ قاتارىنا جەتۋدەگى عالامدىق قادام. ول ەلىمىزدىڭ كوپۇلتتى جانە كوپكونفەسسيالى قوعامى جەتىستىگىنىڭ باستى نەگىزى بولىپ تابىلادى. وسى ايتىلعان مىندەتتەردى وي وزەگىنەن وتكىزىپ، جۇمىلا شەشۋ - جالپى قازاقستاننىڭ جانە وڭىرلەردىڭ كەلەشەكتەگى ساياسي- ەكونوميكالىق ءوسىپ- وركەندەۋىنىڭ كەپىلى.
ۇلت جوسپارى 2020 -جىلعا دەيىنگى رەسپۋبليكامىزداعى تۋريستىك سالانى دامىتۋ جونىندەگى تۇجىرىمدامامەن دە ۇشتاسادى. بۇل باعىتتا بقو- نىڭ الەۋەتى زور، باي تاريحي- مادەني مۇراسى بار. ماسەلەن، ورال تاريحي قالا رەتىندە تۋريستەردى تارتىپ تۇرادى. ال بوكەي ورداسىندا ءوڭىر تاريحىنا قاتىستى جادىگەرلەرى كوپ مۇراجاي ورنالاسقان. ول جەردىڭ تابيعاتى دا اسەم. مىنە، وسىلاردىڭ نەگىزىندە وڭىردەگى تۋريستىك سالانى دامىتۋدى شيراتا ءتۇسۋ كەرەك.
«مەنىڭ ەلىم» ۇلتتىق جوباسىن دايىنداۋ مەن جۇزەگە اسىرۋدا «قازاقستان ەنتسيكلوپەدياسى» ينتەرنەت- جوباسى قاراستىرىلعان. بۇل ەلىمىزدىڭ ازاماتتارى مەن شەتەلدىك تۋريستەرگە رەسپۋبليكامىز تۋرالى كەڭ ماعلۇمات الۋعا مۇمكىندىك بەرمەك. وسىعان بايلانىستى اق جايىق ءوڭىرى تۋرالى جوبا دايىنداۋعا بولادى. وعان جۋرناليستەردى، تۋريستىك كومپانيالاردى تارتۋ قاجەت، اسىرەسە، تەلەديداردىڭ مۇمكىندىگىن پايدالانعان ءجون.
وبلىس اكتيۆىنىڭ جيىنىندا سونداي- اق بقو اسسامبلەياسى ءتوراعاسىنىڭ ورىنباسارى ۆەرا شوحينا، شىڭعىرلاۋ اۋدانىنىڭ اكىمى الديار حالەلوۆ، «نۇر وتان» پارتياسى وبلىستىق فيليالى ءتوراعاسىنىڭ ورىنباسارى گۇلناز قۇلجانوۆا، ەڭبەك ارداگەرى روزا كوجەكوۆا ءوز ۇسىنىس- تىلەكتەرىمەن ءبولىستى.
اۆتور: ەلجان ەرالى