قازاقستاندا 100 ەر ادامنىڭ تەك 2-3-ەۋىنىڭ عانا ۇرىعى جارامدى

استانا. قازاقپارات - قازاقستانداعى جاساندى ۇرىقتاندىرۋدىڭ اۆتورى، بيولوگيا عىلىمدارىنىڭ دوكتورى سالتانات بايقوشقاروۆا جۋرناليستەرگە ەركەكتەردىڭ رەپرودۋكتيۆتى دەنساۋلىعى جايىندا ايتىپ بەردى، دەپ حابارلايدى قازاقپارات ءتىلشىسى.

«نەگىزى، بىزدە 100 ەركەكتىڭ ىشىنەن تەك ەكى- ۇشەۋىنىڭ عانا ۇرىعى جارايدى. بارلىق اناليزدەرىن تەكسەرەسىڭ. جاراسا، التى اي كارانتينگە تۇرادى»، - دەيدى س. بايقوشقاروۆا.

 عالىمنىڭ ايتۋىنشا، دونورلىق ۇرىق ءۇشىن تولەنەتىن اقشا دا كوپ ەمەس. ال جۇمىستىڭ ماشاقاتى باستان اسادى.

«رەسەيدىڭ سانكت- پەتەربۋرگ قالاسىنداعى ءبىر ورتالىقتاعى ارىپتەستەرىم ايتادى، ءبىز 400 دونوردىڭ ىشىنەن ەكى- اق ادامدى تاڭدادىق دەيدى. سوسىن بىرەۋىنىڭ ءتۇرى ۇنامايدى، بىرەۋىنىڭ تاعى بىردەڭەسى ۇنامايدى. ەندى، كەز كەلگەن ادامدى دونورلىققا المايسىڭ عوي. مىسالى، تۇركيادا ەركەكتىڭ دونورلىق ۇرىعىن تەك باۋىرىنان عانا الۋعا رۇقسات بەرەدى. ايەلدەردىڭ ماسەلەسى دە سولاي. بىزدە جالپى رۇقسات بار. ءبىراق جاقىن تۋىسقاندارىڭ بولماسا، ءبارى انونيمدى تۇردە جۇرگىزىلەدى. كەيبىر ماسەلەلەر قۇپيا ساقتالادى. ويتكەنى ەرتەڭ ايەل بارىپ، مىنا بالا سەنىكى دەپ، اليمەنت تالاپ ەتۋى مۇمكىن. اناۋ بايعۇس 10-20 مىڭ تابامىن دەپ، وزىنە تاعى پروبلەما تاۋىپ الادى. سوسىن مورالدىق جاعى بار، زاڭدىق جاعى بار. قيىن ماسەلە. ماعان كۇيەۋ مەن ايەلدىڭ ورتاسىندا جۇمىس ىستەگەن ۇنايدى. ءۇشىنشى ادام قوسىلدى ما، ول - پروبلەما. ءتورتىنشى ادام - سۋرروگات انا قوسىلسا، ول تىپتەن پروبلەما»، - دەپ اتاپ كورسەتتى س. بايقوشقاروۆا.

 ايتا كەتەيىك، بۇگىن استانادا وتكەن كونفەرەنسيا اياسىندا س. بايقوشقاروۆا جاساندى ۇرىقتاندىرۋدى بارىنشا ارزانداتۋعا بولاتىنىن جەتكىزدى.

اۆتور: ارمان اسقاروۆ