ۋنيۆەرسيادا اياقتالعان سوڭ 1,7 مىڭنان اسا وتباسى جايلى باسپاناعا يە بولادى

استانا. قازاقپارات - ۋنيۆەرسيادانىڭ ارقاسىندا الماتىنىڭ الاتاۋ اۋدانى ارى قاراي دامۋعا مۇمكىندىك الىپ وتىر.

8 جىل ىشىندە وسى اۋدانعا قۇيىلعان ينۆەستيتسيا كولەمى 32 ەسەگە ارتقان. وسىعان دەيىن قالانىڭ شىرايسىز شەتى سانالىپ كەلگەن الاتاۋ اۋدانى بۇگىندەرى قالا قوناقتارى مەن تۇرعىندارىن وزىنە تارتىپ وتىرعان جاڭا ورتالىققا اينالىپ وتىر.

وسىندا ۋنيۆەرسيادا باس نىساندارى - «الماتى ارەنا» جانە اتلەتتەر اۋىلى ورنالاسقان. «الماتى ارەناعا» قولسوزىم جەردە 15,6 مىڭ پاتەرلىك شاعىن اۋدان، سونىڭ ىشىندە، «ەسكى ۇيلەر» باعدارلاماسى بويىنشا 9 قاباتتى ەكى ءۇي بوي كوتەرگەن. الداعى 3 جىلدا تاعى 16 مىڭ پاتەردەن تۇراتىن 279 ءۇي سالىنباق.

قىسقى ويىندار وتكىزىلگەن سوڭ، تولىققاندى الەۋمەتتىك ينفراقۇرىلىمى بار اتلەتتەر اۋىلى 1,7 مىڭنان اسا وتباسى ءۇشىن جايلى باسپاناعا اينالادى. اتلەتتەر اۋىلىنىڭ 1748 پاتەرى ارى قاراي ساتىپ الۋ مۇمكىندىگىمەن جالداۋعا بەرىلەدى، وسىلايشا العاشقى 8 جىل ىشىندە 15,5 ميلليارد تەڭگە مولشەرىندە ينۆەستيتسيالاردىڭ %40 قايتارىلماق. بۇل الماتىداعى باسپاناعا كەزەكتى %10 عا ازايتۋى ءتيىس. جاڭا تۇرعىن ءۇي كەشەنىندە ەمحانا، سۋپەرماركەت، بانك بولىمشەلەرى مەن پوچتا، پوليتسيا بەكەتى قىزمەت جاسايتىن بولادى.

ۋنيۆەرسيادا نىساندارى اينالاسىندا جاڭا مادەني ورتالىق قالىپتاسۋدا. قالامىزدىڭ مادەني جانە ساۋلەتتىك كورنەكتى ورىندارىنىڭ بىرىنە اينالاتىن 7000 ادامدى سىيدىرا الاتىن مەشىت سالىنادى دەپ جوسپارلانىپ وتىر. بولاشاق تۇرعىندار مەن قالا قوناقتارى ءۇشىن قازاق تاعامدارىن دايىندايتىن مەيرامحانا، ۇلتتىق اسپاپتار مۋلتيمەديالىق مۇراجايى، «الاتاۋ» ءداستۇرلى ونەر تەاترى، قولونەرشىلەردىڭ كادەسىيلارىن ساتۋ ورتالىعى ءوز جۇمىستارىن جالعاستىرادى.

اتلەتتەر اۋىلىندا 100 گە جۋىق قولونەر شەبەرىنە ارناپ ورتالىق قۇرىلادى. ويىندار اياقتالعان سوڭ، الاتاۋ اۋدانىنىڭ كاسىپورىندارى زاماناۋي جايلى كەڭسەلەرگە جايعاسۋعا مۇمكىندىك الادى. كەڭسەلەردى جالداۋ قۇنى قالا ىشىندەگى باعادان 2 ەسەگە ارزانىراق بولماق.