قورداي وقيعاسى بويىنشا ۇكىم شىقتى: 1 ادام اقتالىپ، 50- ءى كىنالى دەپ تابىلدى

سوت شەشىمى تۋرالى ءوڭىر بويىنشا سوتتار اكىمشىسىنىڭ باسشىسى بەرىك قۇلتاسوۆ وڭىرلىك كوممۋنيكاتسيالار قىزمەتىندە وتكەن بريفينگىدە ايتتى، دەپ حابارلايدى قازاقپارات ءتىلشىسى.

«جامبىل وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى اعىمداعى جىلدىڭ 27 -ساۋىرىندە قورداي اۋدانىنداعى جاپپاي تارتىپسىزدىك بويىنشا ۇكىم شىعاردى. وتكەن جىلدىڭ 7-8 -اقپانى ارالىعىندا جامبىل وبلىسى قورداي اۋدانى ماسانشى، بۇلار- باتى جانە اۋقاتتى اۋىلدارىندا جاپپاي تارتىپسىزدىك ورىن الىپ، سالدارىنان 10 ازامات قازا تاپتى، تاعى ءبىر ادام جانىپ جاتقان عيماراتقا قۇلاپ، كوز جۇمدى»، - دەدى ب. قۇلتاسوۆ.

سونداي- اق، سپيكەر 158 ازامات پەن 20 پوليتسيا قىزمەتكەرى جاراقات العانىن جەتكىزدى. جاپپاي تارتىپسىزدىك كەسىرىنەن 156 تۇرعىن ءۇي مەن ساۋدا نىساندارى، 102 اۆتوكولىك قۇرالى ءبۇلىنىپ، مەنشىك يەلەرىنە كەلتىرىلگەن زالال 829 ميلليون 848 مىڭ تەڭگە بولدى. جامبىل وبلىسى پوليتسيا دەپارتامەنتىنىڭ 10 اۆتوكولىگى زاقىمدالدى. مەملەكەتكە 3 ميلليون 291 مىڭ تەڭگە زالال كەلتىرىلگەن.

بەرىك قۇلتاسوۆ، بۇعان دەيىن سوت ۇكىمى بويىنشا بۇزاقىلىق ارەكەتتەرمەن دەنساۋلىققا زيان كەلتىرىپ، بيلىك وكىلدەرىنە كۇش قولدانعانى ءۇشىن 6 ادام سوتتالعاندىعىن جەتكىزدى. بۇگىنگى قىلمىستىق ءىس 2020 -جىلدىڭ 8 -جەلتوقسانىنان بيىلعى -19 ساۋىرگە دەيىن جۇرگىزىلدى. وعان ەكى پروكۋرور، 366 جابىرلەنۋشى جانە 16 جابىرلەنۋشى وكىلى، 10 قورعاۋشى جانە 4 اۋدارماشى قاتىسقان.

«ءىس بويىنشا 51 ادام ايىپتالۋشى رەتىندە سوتقا بەرىلىپ، ونىڭ ىشىندە 33- ءى قاماۋدا، 18 ادام جەكە كەپىلدىك جانە ەشقايدا كەتپەۋ قولحاتى بويىنشا ۇستالعان. سوتتالۋشىلارعا ءتۇرلى سونىڭ ىشىندە اۋىر جانە اسا اۋىر قىلمىستار جاسادى دەگەن ايىپتار تاعىلدى. سوت زاڭ مەن سوت الدىنداعى تەڭدىك پرينتسيپىن باسشىلىققا الىپ، جينالعان دالەلدەمە مەن قىلمىستىق زاڭنامادا كورسەتىلگەن جازا اياسىندا كەلەسى شەشىمدەردى شىعاردى: 50 ادامدى كىنالى دەپ تانىپ، ءبىر ادامنىڭ كىناسىنىڭ دالەلدەنبەۋىنە بايلانىستى ونى اقتادى. سوتتالۋشىلاردىڭ كىنالارى مولەكۋليارلىق، سوت- تەرگەۋ قورىتىندىلارى مەن جاسىرىن بەينەباقىلاۋ دالەلدەمەلەرىمەن تولىق دالەلدەنگەن»، - دەدى ب. قۇلتاسوۆ.

ايتا كەتەيىك، 19 ادامعا باس بوستاندىعىنان ايىرۋ، 31 ادامعا شارتتى تۇردە نەمەسە باس بوستاندىعىن شەكتەۋ تۇرىندە جازا تاعايىندالدى. ەڭ ۇزاق تاعايىندالعان مەرزىم - 20 جىل. سوت ۇكىمى زاڭدى كۇشىنە ەنگەن جوق.

اۆتور: سايا سەمباي