استانادا 1-4 - سىنىپ وقۋشىلارى تەگىن تاماقپەن قامتاماسىز ەتىلەدى
وسى ماسەلە بويىنشا استانا قالاسىنىڭ ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى جانات نۇرپەيىسوۆ بايانداما جاسادى. بيۋدجەتتىك قاراجاتتى يگەرۋدى مونيتورينگتەۋ نەگىزىندە باسقارمالار اراسىندا قايتا ءبولۋ جولىمەن جەكە بيۋدجەتتىك باعدارلامالار بويىنشا جىلدىق جوسپارلىق تاعايىنداۋلاردى قايتا قاراستىرۋ تۋرالى ۇسىنىستار ەنگىزىلدى. قالالىق ءماسليحاتتىڭ شەشىمىمەن ەلوردانىڭ 2015 -جىلعا ارنالعان بيۋدجەتىنىڭ جالپى كولەمى 358 ميلليارد 190 ميلليون تەڭگەنى قۇرادى.
ەلوردانىڭ الەۋمەتتىك كورسەتكىشىنىڭ ءوسۋى قالالىق بيۋدجەت جوسپارىنىڭ ورىندالۋىنا اسەر ەتتى. اعىمداعى جىلدىڭ قاڭتار- تامىزىنا دەيىن جەرگىلىكتى بيۋدجەتكە 120 ميلليارد 200 ميلليون تەڭگە تۇسكەن. جوسپار اسىرا ورىندالىپ، 5,4 ملرد تەڭگەنى قۇرادى.
استانا قالاسىنىڭ ءبىلىم باسقارماسىنا بيۋدجەتتەن 1 ميلليارد 162 ميلليون تەڭگە، ونىڭ ىشىندە 1-4 - سىنىپ وقۋشىلارىن تەگىن تاماقپەن قامتاماسىز ەتۋگە - 1 ميلليارد 93 ميلليون تەڭگە بولىنەدى. ءبىر ادامعا كۇنىنە 268 تەڭگە بولىنەدى. 21 ميلليون تەڭگە مەكتەپتەردى اۆتونومدى جىلىتۋعا ديزەل جانارمايىن ساتىپ الۋعا، ال قالعان قاراجات وقۋلىقتارعا بولىنەدى.
سونداي- اق، استانا قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنا قارتتار كۇنىنە وراي ءبىر رەتتىك تولەم جاساۋ ءۇشىن 60 ميلليون تەڭگە ءبولىندى. دەنساۋلىق ساقتاۋ باسقارماسىنا 2015 - جىلعا 355 ميلليون تەڭگە قاراستىرىلدى، قان مەن ونىڭ قۇرامىن وندىرۋگە - 95 ميلليون تەڭگە، ءدارى- دارمەكتەر ساتىپ الۋعا - 200 ميلليون تەڭگە جانە جاڭادان بەرىلگەن ەكى مەديتسينالىق ورتالىققا - 60 ميلليون تەڭگە بولىنەدى. سونداي- اق الەۋمەتتىك ماڭىزدى نىساندارعا كىرەبەرىس جولدارىن جوندەۋگە 188 ميلليون تەڭگە جانە «Buslane» جولدارىن جاساۋ ءۇشىن - 200 ميلليون تەڭگە، سونداي- اق «استانا LRT» باعدارلاماسىن جۇزەگە اسىرۋعا 1 ميلليارد 66 ميلليون تەڭگە قاراجات قاراستىرىلدى.
سونىمەن قاتار، ءماسليحات سەسسياسىندا ەلوردانىڭ قۇرىلىسىنا، قالىپتاستىرۋعا جانە دامىتۋعا قوسقان زور ۇلەسى ءۇشىن «سترويكونسترۋكتسيا» ا ق پرەزيدەنتى ۆيكتور بۋللەرگە «استانا قالاسىنىڭ قۇرمەتتى ازاماتى» اتاعى بەرىلدى.