قىتايدىڭ الەمدىك ەكونوميكانىڭ وسۋىنە قوسقان ۇلەسى 1/3-نەن اسادى
بۇل تۋرالى ق ح ر مەملەكەتتىك كەڭەسىنىڭ پرەمەرى لي شياڭمەن ب و ا و ازيا فورۋمى (ب ا ف) الاڭىندا وتكەن كەزدەسۋ بارىسىندا حالىقارالىق ۆاليۋتا قورىنىڭ (ح ۆ ق) باسقارۋشى ديرەكتورى كريستالينا گەورگيەۆا مالىمدەدى، دەپ حابارلايدى قازاقپارات ءتىلشىسى.
ح ۆ ق باسشىسىنىڭ ايتۋىنشا، قىتاي ەكونوميكاسى قارقىن الۋدا جانە بيىل ونىڭ الەمدىك ەكونوميكانىڭ وسۋىنە قوسقان ۇلەسى 1/3 نەن اسادى، وسىلايشا باسقا ەلدەر ءۇشىن ماڭىزدى مۇمكىندىكتەر تۋادى.
قور قىتايمەن ماكروەكونوميكالىق ساياساتتى رەتتەۋ سالاسىنداعى ىنتىماقتاستىقتى تەرەڭدەتۋگە، ساۋدانىڭ بولشەكتەنۋىنە جول بەرمەۋگە جانە دامۋشى ەلدەرگە قارىز داعدارىستارىمەن كۇرەسۋگە كومەكتەسۋگە دايىن، وسىلايشا الەم تۇراقتى جانە قاۋىپسىز بولادى.
ءوز كەزەگىندە ق ح ر مەملەكەتتىك كەڭەسىنىڭ پرەمەرى لي شياڭ بيىلعى جاھاندىق ەكونوميكالىق جاعداي وپتيميزمگە يتەرمەلەمەيتىنىن جانە بولجاۋ مۇمكىن ەمەس فاكتورلاردىڭ بار ەكەنىن اتاپ ءوتتى. كۇردەلى سىن-قاتەرلەر جاعدايىندا حالىقارالىق قاۋىمداستىق ماكروەكونوميكالىق ساياساتتى ۇيلەستىرۋدى كۇشەيتىپ، جاھاندىق ءوندىرىس پەن جەتكىزۋ تىزبەگىنىڭ قاۋىپسىزدىگى مەن تۇراقتىلىعىن ساقتاۋى قاجەت ەكەنىن دە ايتىپ ءوتتى.
«ءبىزدىڭ ونىمدىلىكتى جاقسارتۋعا جانە جىل سايىنعى دامۋ ماقساتتارىنا قول جەتكىزۋگە ۇلەس قوسۋعا سەنىمىمىز بەن مۇمكىندىگىمىز بار»، - دەدى ول.
28-31-ناۋرىز ارالىعىندا قىتايدا جىل سايىنعى ب و ا و ازيا فورۋمى وتەدى.
وسىعان دەيىن ا ح ق و باسشىسىنىڭ ب و ا و ازيالىق فورۋمى اياسىنداعى پانەلدىك سەسسياعا قاتىسقانى حابارلاندى.
رۋسلان سۇلەيمەنوۆ
