ەلىم- اي كووپەراتيۆى ازاماتتاردىڭ 1,3 ميلليارد تەڭگەسىن قالتاعا باسقان
بۇل جايىندا ق ر قارجىلىق مونيتورينگ اگەنتتىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
بۇعان دەيىن حابارلاعانىمىزداي، بيىلعى قاڭتار ايىندا الماتى وبلىسىندا كووپەراتيۆ تۇرىندەگى «ەلىماي-2019» قارجى پيراميداسى انىقتالدى. كووپەراتيۆ باسشىسى ەربول قيزبايەۆ پەن ونىڭ جۇبايى جازيرا ومىربايەۆاعا مەملەكەتارالىق ىزدەۋ جاريالانعان بولاتىن.
«ق ر قارجىلىق مونيتورينگ اگەنتتىگىنىڭ الماتى وبلىستىق اۋماقتىق دەپارتامەنتى قارجى پيراميداسى باسشىلارىنىڭ 2019 -جىلدىڭ قاراشاسىنان 2021 -جىلدىڭ قاراشاسىنا دەيىن ەلىمىزدىڭ 12 ءوڭىرىنىڭ اۋماعىندا پايىزسىز زايم ۇسىنۋ ارقىلى جىلجيتىن جانە جىلجىمايتىن مۇلىك ساتىپ الۋعا كومەك كورسەتۋ جەلەۋىمەن 2 مىڭ سالىمشىنىڭ 1,3 ميلليارد تەڭگە قاراجاتىن تارتقانىن انىقتادى. كووپەراتيۆ قۇرىلتايشىلارىنىڭ ونى تىركەۋگە جانە قارجىلىق- شارۋاشىلىق قىزمەتىنە ءىس جۇزىندە ەشقانداي قاتىسى جوق. قۇرىلتايشىلىق جانە وزگە دە قۇجاتتارعا قول قويماعان. تۇتىنۋشىلار كووپەراتيۆى ءوز قىزمەتىن قولدانىستاعى زاڭنامانى بۇزا وتىرىپ جۇزەگە اسىرعان.
قازىردىڭ وزىندە قارجىلىق پيراميدا باسشىلىعىن قىلمىستىق جاۋاپكەرشىلىككە تارتۋ تۋرالى شاعىممەن زارداپ شەگۋشى دەپ تانىلعان 350-دەن استام ازامات جۇگىندى. سوت سانكسياسىمەن اتالعان كووپەراتيۆتىڭ ەسەپ ايىرىسۋ شوتىنداعى اقشا قاراجاتى، جىلجيتىن جانە جىلجىمايتىن مۇلىكتەر بۇعاتتالدى»، - دەپ اتاپ وتەدى اگەنتتىكتەن.
ۆەدومستۆو مالىمەتىنشە، تەرگەۋ سوتى ەكى كۇدىكتىگە قاتىستى تۇتقىنعا الۋ تۇرىندەگى بۇلتارتباۋ شاراسىن تاڭدادى. شىمكەنت قالاسىنىڭ، اقتوبە، باتىس قازاقستان، قاراعاندى جانە تۇركىستان وبلىستىق دەپارتامەنتتەر دە اتالعان وڭىرلەردىڭ اۋماعىندا قارجى پيراميداسىنا باسشىلىق ەتۋ فاكتىسى بويىنشا سوتقا دەيىنگى تەرگەۋ باستادى. پروكۋراتۋرانىڭ ۇيلەستىرۋىمەن دالەلدەردى جيناۋ، سونىمەن قاتار كۇدىكتىلەر شىعارعان اكتيۆتەردى ىزدەۋ بويىنشا تەرگەۋ امالدارى جۇرگىزىلىپ جاتىر.
«سىزدەردى مۇقيات ءارى اباي بولۋعا، قىسقا مەرزىمنىڭ ىشىندە جوعارى تابىس اكەلەتىن كۇدىكتى ۇسىنىستاردان باس تارتۋعا شاقىرامىز. ەگەر ءسىز «ەلىم- اي» تۇتىنۋشىلار كووپەراتيۆى» قارجىلىق پيراميداسىنىڭ زارداپ شەگۋشىسى بولساڭىز، وندا ق م ا- نىڭ مىنا تەلەفون نومىرىنە شۇعىل حابارلاسىڭىز: 877172708478»، - دەلىنگەن ۆەدومستۆو حابارلاسىندا.
اۆتور: مارلان جيەمباي