اتىراۋ وبلىسىندا جىل باسىنان 1,2 مىڭ گەكتار ورمان القابى ورتەنگەن
وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنان ءمالىم ەتكەندەي، بىلتىر 7 ورمان ءورتى تىركەلگەن.
«بيىل اتىراۋ وبلىسىنىڭ ورمان قورىنداعى 1246 گەكتاردى شارپىعان 3 ءورت وقيعاسى تىركەلدى. بۇل بىلتىرعى كورسەتكىشپەن سالىستىرعاندا 42 ەسە تومەن. ال تۇرعىندار تاراپىنان اباتتاندىرۋ، قۋراعان شوپتەردى ورتەۋ كەزىندە وتتى قاراۋسىز قالدىرۋ سالدارىنان شابىندىق جەرلەردە، اشىق الاڭداردا، اۆتوجول بويى مەن كانال جاعالاۋىندا 91 گەكتار اۋماق جانىپ كەتتى»، - دەپ حابارلادى ۆەدومستۆودان.
قازىر ءورت قاۋىپسىزدىگى ەرەجەسىنىڭ بۇزىلۋىن بولدىرماۋ ءۇشىن تۇرعىندار اراسىندا پروفيلاكتيكالىق ءتۇسىندىرۋ جۇمىسى جۇرگىزىلىپ جاتىر.
«ورمان مەن دالالىق القاپتاردا ءورت قاۋىپسىزدىگى ەرەجەلەرىن بۇزعانى ءۇشىن كىنالى ادامدار جەرگىلىكتى اتقارۋشى ورگاندار، پوليتسيا، ورمان شارۋاشىلىعى مەن توتەنشە جاعدايلار قىزمەتى قىزمەتكەرلەرىنەن قۇرالعان موبيلدى توپ ارقىلى اكىمشىلىك جاۋاپكەرشىلىككە تارتىلادى. سول سەبەپتەن، وبلىس تۇرعىندارى مەن قوناقتارى ءورت قاۋىپسىزدىگى ەرەجەسىن قاتاڭ ساقتاۋى ءتيىس. بىرىنشىدەن، شابىندىق، ەگىستىك، ورمان القاپتارىندا قۋراعان شوپتەردى، قوقىستاردى ورتەپ، باقىلاۋسىز قالدىرۋعا جول بەرىلمەۋى كەرەك. ەكىنشىدەن، اۋا رايى قۇرعاق، ىستىق جانە قاتتى جەل كەزىندە وت جاقپاعان ءجون. ۇشىنشىدەن، تابيعات اياسىنداعى دەمالىس اياقتالعان كەزدە جانعان وتتى سۋ قۇيىپ، قۇم نەمەسە توپىراق سەۋىپ، تولىق وشكەنىنە كوز جەتكىزگەن دۇرىس. ەڭ باستىسى، ءورتتى ءوز كۇشىڭىزبەن ءسوندىرۋ مۇمكىن بولماسا، 101، 112 نومىرلەرى ارقىلى حابارلاۋ قاجەت»، - دەپ ءمالىم ەتتى قوعاممەن بايلانىس توبىنان.