قازىرگى 1-سىنىپ وقۋشىلارى 2050 -جىلى قازاقستان ەكونوميكاسىنىڭ بارلىق سالالارىندا جۇمىس ىستەيتىن بولادى - ەلباسى - فوتو

«بۇگىن 1 -قىركۇيەك - ءبىلىم كۇنى. بارلىق وقۋشىلاردى، ستۋدەنتتەردى جانە ولاردىڭ اتا- انالارىن بۇگىنگى كۇنمەن قۇتتىقتايمىن. بۇگىن ءبىزدىڭ 2 ميلليون 600 مىڭ بالامىز وقيتىن 7,5 مىڭ مەكتەپ ەسىگىن ايقارا اشتى. قىزىقتىسى، بيىل 300 مىڭ بالا ءبىرىنشى سىنىپقا قادام باستى. وسىنشاما بالانىڭ ءبىر جىلى مەكتەپ تابالدىرىعىن اتتاۋى العاش رەت بولىپ وتىر»، - دەدى مەملەكەت باسشىسى قازاقستاندىق جۋرناليستەردىڭ ساۋالىنا جاۋاپ بەرىپ.
ن. نازاربايەۆ وسى جىلدارى قازاقستاندا مەكتەپتەر مەن بالاباقشالار قارقىندى تۇردە سالىنعانىن ەسكە سالدى. «ولار - ەل بولاشاعى. بۇگىن ءبىرىنشى سىنىپقا بارعاندار 2050 -جىلى قازاقستان ەكونوميكاسىنىڭ بارلىق سالالارىندا جۇمىس ىستەيتىن بولادى. ءبىزدىڭ قالاي ءبىلىم بەرەتىنىمىزگە، نەنى ۇيرەتەتىنىمىزگە بايلانىستى بولادى. ءبىزدىڭ مەكتەپتەرىمىزدىڭ، زياتكەرلىك مەكتەپتەرىمىزدىڭ، جاڭا ۋنيۆەرسيتەتتىڭ ساپاسى - مۇنىڭ بارلىعى بالالار مەن اتا- انالارىن ولاردى وقىتۋعا ىنتالاندىرادى. اتا- انالارى بالالارىنا نە بەرە الادى؟ ءوز ماحابباتى مەن ۇلكەن ومىردە قاجەتتى بولاتىن ءبىلىم بەرەدى!» - دەدى ن. نازاربايەۆ.
«قازاقستاندىق اتا- انالار بالالارىن وقىتۋ ءۇشىن ەشتەڭە ايامايتىنىن بىلەمىن. بۇل دۇرىس. بارلىعىن ءبىلىم كۇنىمەن قۇتتىقتايمىن، ءار ءبىرىنشى سىنىپ وقۋشىسىنا بيىل وتانىمىز - قازاقستان تۋرالى كىتاپ سىيلادىم. ءاربىرى مەنەن كىتاپ سىيلىققا الادى. ولار بۇعان قۋانادى دەپ ويلايمىن»، - دەپ اتاپ ءوتتى مەملەكەت باسشىسى.
ەسكە سالا كەتەيىك، كەشە ن. نازاربايەۆتىڭ قىتايعا جاساعان مەملەكەتتىك ساپارى اياسىندا قحر ءتوراعاسى شي جينپيڭمەن، ءۇش قىتايلىق كورپوراتسيانىڭ (CNPC، CITIC Group, Qinghua) باسشىلارىمەن كەزدەسۋلەرى ءوتىپ، 12 ەكىجاقتى قۇجاتقا قول قويىلعان بولاتىن.
ساپار 3 -قىركۇيەككە دەيىن جالعاسادى. بۇگىن ق ح ر مەملەكەتتىك كەڭەسىنىڭ پرەمەرى لي كىشياڭمەن كەزدەسۋ وتەدى. بەيسەنبى كۇنى ق ر پرەزيدەنتى قىتاي حالقىنىڭ جاپوندىق باسقىنشىلارعا قارسى كۇرەسى سوعىسىنداعى جەڭىسىنىڭ 70 جىلدىعىنا ارنالعان سالتاناتتى پارادقا قاتىسادى.