ازيادانىڭ سەگىزىنشى كۇنى: قازاقستان قورجىنىندا - 1 التىن، 1 كۇمىس، 1 قولا
ەستەرىڭىزگە سالا كەتەيىك، بۇگىن ەل قورجىنىنا جالعىز التىن مەدالدى دجيۋ-دجيتسۋدان 77 كەلىدە ەل نامىسىن قورعاعان رۋسلان يسرايلوۆ الىپ بەردى. رۋسلان فينالدىق سىندا قىرعىزستاندىق نۇرسۇلتان ءالىمقۇلوۆتى جەڭدى. بۇل دجيۋ-دجيتسۋ شەبەرلەرى جەڭىپ العان ەكىنشى التىن. كەشە دارحان نورتايەۆ چەمپيوندىق اتاقتى يەلەنگەن ەدى.
ال بۇگىنگى كۇمىس جۇلدەنى وسىعان دەيىن حابارلاعانىمىزداي، كاراتەشى ديدار ءامىرالى ەنشىلەدى. ول فينالدا كۋۆەيتتىك قارسىلاسى ءالي ابدۋازيزگە 0:4 ەسەبىمەن جول بەردى. سونىمەن قاتار سوڭعى قولا مەدالدى 400 مەترگە جۇگىرۋدە قازاقستاندىق جەڭىل اتلەت ەلينا ميحينا جەڭىپ الدى
ايتا كەتەيىك، يندونەزيادا ءوتىپ جاتقان ازيادا-2018 ويىندارىنىڭ سەگىزىنشى كۇنىنىڭ جالپى قورىتىندىسى بويىنشا قازاقستان قۇراماسى 5 التىن، 8 كۇمىس جانە 28 قولا مەدالمەن جالپى ەسەپتە 11- ورىندى ساقتاپ تۇر.
ازىرگە كوش باسىندا 78 التىن، 59 كۇمىس، 37 قولا (174) مەدال جەڭىپ العان قىتاي قۇراماسى. ال ەكىنشى ورىندا 40 التىن، 34 كۇمىس، 38 قولا (122) مەدالعا يە بولعان جاپونيا سپورتشىلارى كەلەدى. ۇزدىك ۇشتىكتى 27 التىن، 30 كۇمىس، 37 قولا (94) مەدال ولجالاعان وڭتۇستىك كورەيا سپورتشىلارى تۇيىندەپ تۇر.
ازيا ويىندارىنا 440 قازاقستاندىق سپورتشى قاتىسىپ جاتىر. 18- تامىز كۇنى الاۋى تۇتانعان «سارى قۇرلىق» دوداسى 2- قىركۇيەك كۇنى ءوز مارەسىنە جەتەدى.
اۆتور: كۇنسۇلتان وتارباي
