ەڭ تەرەڭ ۇڭعىما ازياداعى رەكوردتى جاڭالادى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
8 مىڭ 600 جىلدىق تاريحى بار نان تابىلدى - TRT
كونيانىڭ چۋمرا اۋدانىندا ورنالاسقان، نەوليت داۋىرىندە شامامەن 8 مىڭ ادام بىرگە ءومىر سۇرگەن چاتالحويۇكتە جۇرگىزىلگەن قازبا جۇمىستارى كەزىندە 8 مىڭ 600 جىلدىق نان تابىلدى، دەپ حابارلايدى تۇركيا راديو تەلەۆيزيا پورتالى.
اتالعان ب ا ق-تىڭ دۇنيە جۇزىندەگى العاشقى ەلدى مەكەندەردىڭ ءبىرى چاتالحويۇكتە «مەكان 66» دەپ اتالاتىن ايماقتا ىرگەلەس بالشىق كىرپىش ۇيلەرگە جوعارىدان كىرۋگە بولاتىن پەش قۇرىلىمى تابىلدى.
ايتا كەتەيىك، تۇركيادا بۇرىنعى داۋىرلەردەن قالعان كوپتەگەن ورىندار بار. چاتالحويۇك نەوليتيكالىق ايماعى - وسىلاردىڭ ءبىرى.
بيداي، ارپا، بۇرشاق تۇقىمدارى جانە تاعام بولۋى مۇمكىن پالما كولەمىندەگى ولجا نەگىزىنەن قيراعان پەشتىڭ اينالاسىندا تابىلدى.
«چاتالحويۇكتە تابىلعان بۇل ولجانىڭ دۇنيەدەگى ەڭ كونە نان ەكەنىن ايقىن. بۇل ورگانيكالىق قالدىقتاردى باقىلاۋ، تالداۋ جانە مەرزىمىن ەسكەرە وتىرىپ، بۇل شامامەن 8 مىڭ 600 جىل بولعان نان دەپ ايتا الامىز»، دەيدى قازبا توبىنىڭ جەتەكشىسى جانە انادولۋ ۋنيۆەرسيتەتىنىڭ وقىتۋشىسى دوتسەنت الي ۋمۋت تۇرىكجان.
ق ت ج قىتايدان تاسىمالداۋ گەوگرافياسىن كەڭەيتۋدە - «حالىق گازەتى»
جياڭسۋ پروۆينسياسىنىڭ (ق ح ر) نانجيڭ قالاسىندا «ق ت ج» ۇ ك» ا ق باسقارما ءتوراعاسىنىڭ لوگيستيكا جونىندەگى ورىنباسارى ەرلان قويشىبايەۆ جياڭسۋ پروۆينسياسىنىڭ حالىق ۇكىمەتى كولىك دەپارتامەنتىنىڭ جانە وسى پروۆينسيانىڭ ەڭ ءىرى مەملەكەتتىك ساۋدا توبى Jiangsu SOHO Holdings Group باسشىلارىمەن كەزدەستى.
بۇل تۋرالى قىتايدىڭ «حالىق گازەتى» باسىلىمى «Kazakhstan Today»-گە سىلتەمە جاساپ حابارلايدى.
اتالعان ب ا ق-تىڭ كەلتىرگەن مالىمەتىنە سۇيەنسەك، كەزدەسۋ بارىسىندا «KTZ Express» ا ق جانە Jiangsu International Rail Freight Express ستراتەگيالىق ىنتىماقتاستىق تۋرالى كەلىسىمگە قول قويعان. سونىمەن قاتار، كونتەينەرلىك پويىزداردى قازاقستان ارقىلى، ونىڭ ىشىندە ترانسكاسپي حالىقارالىق كولىك باعدارى (ت ح ك ب) بويىنشا بىرلەسىپ ۇيىمداستىرۋ جانە جونەلتۋ جونىندەگى ۋاعدالاستىققا قول جەتكىزگەن.
ايتا كەتەيىك، اعىمداعى جىلدىڭ باسىنان باستاپ Yuxinou جانە ق ت ج نانجيڭنەن (ق ح ر) اپشەرونعا (ءازىربايجان) جەتكىزۋ مەرزىمى ورتا ەسەپپەن 18 كۇنگە دەيىن ت ح ك ب بويىنشا بىرلەسكەن سەرۆيس ۇيىمداستىرعان.
سونداي-اق قىتايدىڭ «حالىق گازەتى» باسىلىمىندا «2023 -جىلى قازاقستاننىڭ قىتايعا اۋىل شارۋاشىلىعى ونىمدەرىنىڭ ەكسپورتى 1 ميلليارد دوللاردان استى» دەگەن تاقىرىپتاعى اقپارات جارىق كوردى.
قىتايدىڭ قازاقستانداعى توتەنشە جانە وكىلەتتى ەلشىسى جاڭ شياۋ ق ر اۋىل شارۋاشىلىعى ءمينيسترى ايداربەك ساپاروۆمەن كەزدەسكەن.
«ق ر اۋىل شارۋاشىلىعى مينيسترلىگىنىڭ حابارلاۋىنشا، 2023 -جىلى قازاقستاننىڭ قىتايعا اۋىل شارۋاشىلىعى ونىمدەرىنىڭ ەكسپورتى 2 ەسەگە ءوسىپ، 1 ميلليارد دوللاردان استى»، دەپ جازادى قىتايلىق ب ا ق.
موڭعوليادا اپاتتان 2 ميلليوننان استام باس مال ءولدى - «جەنمين جيباو»
23 اقپانعا دەيىن بۇل ەلدە 2 ميلليون 8946 باس مال قاقاعان اياز بەن قارلى بوراننان ولگەن. بۇنداي جاعداي الداعى ۋاقىتتا دا جالعاسۋى مۇمكىن، دەپ حابارلايدى قىتايدىڭ «جەنمين جيباو» پورتالى موڭعوليانىڭ توتەنشە جاعدايلار باس مەكەمەسىنىڭ اقپاراتىنا سىلتەمە جاساپ.
اتالعان ب ا ق-تىڭ دەرەگىنشە، موڭعوليا بيىل سوڭعى 50 جىلداعى ەڭ قاتتى قارلى بوراندى باستان وتكەرۋدە. ءىرى كولەمدەگى شىعىن موڭعوليانىڭ بيىلعى مال ەكسپورتىنىڭ ساۋداسىنا اسەر ەتۋى ابدەن مۇمكىن.
موڭعوليا ۇلتتىق مەتەورولوگيالىق جانە قورشاعان ورتانى باقىلاۋ بيۋروسىنىڭ جاڭالىقتارىنا سايكەس، 2023 -جىلى قىستىڭ باسىنان بەرى مال جاعىنان بۇرىن-سوڭدى بولماعان اۋىر شىعىنعا ۇشىرادى. بۇنداي قاتتى قىس 1975 -جىلدان بەرگى ەڭ جوعارى رەكوردتى جاڭارتتى.
ونەرلى ءبۇلدىرشىن ىڭكار داۋلەتبەك قىزى - janadauir.com
وسى اپتادا موڭعوليالىق «جاڭا ءداۋىر» باسىلىمى ونەرلى ءبۇلدىرشىن ىڭكار داۋلەتبەك قىزى تۋرالى جازعان.
اتالعان ب ا ق-تىڭ مالىمەتىنشە، ول نوگووننۋۋر سۇمىنى(اۋدانى) جالپى ءبىلىم بەرەتىن مەكتەبىنىڭ 5-سىنىپ وقۋشىسى. 3 جاسىنان باستاپ ءانشى بالاپان سايىسىنا، ءارتۇرلى ءبي سايىستارىنا قاتىسىپ، بالاباقشانى «سۇمىندىق ونەرلى ءبۇلدىرشىن» نوميناتسياسىمەن اياقتايدى.
ىڭكار داۋلەتبەك قىزى ۇلانباتىر قالاسىندا وتكەن «ءحۇن دوموگ» بالالار فەستيۆالىنە قاتىسىپ ارنايى جۇلدەمەن ماراپاتتالعان ەكەن. 2022 جانە 2023 -جىلدارى ءبيشى ۇستاز، م م و ق اينۇر يۋرا قىزىنىڭ كومانداسىنا كەلىپ، سول جىلدارى ءبىرشاما تابىستارعا جەتكەن.
اتاپ ايتقاندا، رەسەي ەلىنىڭ «گورنو- التاي»، «بارناۋل» قالالارىنادا وتكەن حالىقارالىق ءبي سايىستارىنا «دومبىراشى قىز» جەكە جانە توپ بيىمەن قاتىسىپ، تابىس بيىگىنەن كورىنگەن.
سونداي-اق، ىڭكار داۋلەتبەك قىزى قازاق، مونگول، ورىس، ءۇندى بيلەرىن بيلەيدى. 2022 -جىلى سۇمىننىڭ ۇزدىك وقۋشىسى بولسا، 2023 -جىلى ايماقتىق ۇزدىك وقۋشى ماراپاتىمەن سىيلانعان.
«العا اسقاق ارمان، بيىك ماقسات قويىپ وقۋىم مەن ونەرىمدى قاتار الىپ جۇرەمىن» دەيدى ىڭكار. ەندەشە ءبىز دە ىڭكارعا تابىستار تىلەيمىز»، دەپ جازادى موڭعوليالىق باسىلىم.
وزبەكستان مەن قازاقستان بىرلەسكەن جوبالار بويىنشا ماسەلەلەردى شەشۋ مەحانيزمىن ازىرلەدى - «ءوز ا»
وزبەكستان رەسپۋبليكاسى ينۆەستيتسيالار، يندۋستريا جانە ساۋدا ءمينيسترى لازيز قۋدراتوۆ پەن قازاقستان رەسپۋبليكاسى ساۋدا جانە ينتەگراتسيا ءمينيسترى ارمان شاققاليەۆ ونلاين فورماتتا كەلىسسوزدەر جۇرگىزدى.
بۇل تۋرالى وزبەكستاندىق «ءوز ا» اقپاراتتىق اگەنتتىگى حابارلادى.
وزبەكستاندىق ب ا ق-تىڭ دەرەگىنشە، ينۆەستيسيالار، يندۋستريا جانە ساۋدا ءمينيسترىنىڭ حابارلاۋىنشا، مينيسترلىكتەر مەن ۆەدومستۆو باسشىلارىنىڭ قاتىسۋىمەن وتكەن كەلىسسوزدەر اياسىندا جوعارى دەڭگەيدەگى ساپار ناتيجەلەرى بويىنشا ۋاعدالاستىقتاردى ىسكە اسىرۋ بارىسى جان-جاقتى تالقىلاندى. سونىڭ ىشىندە ينۆەستيتسيا جانە ساۋدا كەلىسىمدەرى مەن ەكىجاقتى كۇن تارتىبىندەگى باسقا دا وزەكتى ماسەلەلەر قاراستىرىلعان.
«حيميا، ەلەكتروتەحنيكا، ماشينا جاساۋ، اۋىل شارۋاشىلىعى سالالارىندا بىرلەسكەن جوبالاردى جۇزەگە اسىرۋدىڭ پراكتيكالىق شارالارى، سونداي-اق بار ماسەلەلەردى بىرلەسىپ شەشۋ تەتىكتەرى ازىرلەندى»، دەلىنگەن دەپ جازادى «ءوز ا».
كەلىسسوزدەر سوڭىندا بىرلەسكەن باستامالاردى جەدەل جۇزەگە اسىرۋ بارىسىندا تۋىندايتىن ماسەلەلەرگە جەدەل دەن قويۋ ماقساتىندا مينيسترلىكتەر مەن ۆەدومستۆولاردىڭ جاۋاپتى باسشىلارىنا ءتيىستى تاپسىرمالار بەرىلىپ، ىسكە اسىرۋ مەرزىمدەرى بەلگىلەنىپ، وسىنداي جۇمىس كەزدەسۋلەرىن وتكىزۋ تاجىريبەسى كەلىسىلگەن.
قىتايدىڭ ەڭ تەرەڭ ۇڭعىماسى ازياداعى رەكوردتى جاڭالادى - CNR
قىتايدىڭ العاشقى 10000 مەترلىك تەرەڭ جەراستى عىلىمي بارلاۋ ۇڭعىماسى رەسمي تۇردە 10000 مەترلىك بەلگىدەن ءوتتى. بۇل قىتايدىڭ تەرەڭ جەر قويناۋىندا ۇلكەن سەرپىلىسكە قول جەتكىزگەنىن كورسەتەدى، دەپ حابارلايدى قىتايدىڭ «ورتالىق حالىق راديوسى».
قىتاي مۇناي توبى تارىم مۇناي الابى اتقارۋشى جوراسى پارتيا قىزمەت كوميتەتىنىڭ ءتوراعاسى ۋان چينحۋانىڭ ايتۋىنشا، تاكلاماكان 1-شى ۇڭعىماسى 10000 مەتردەن استام بۇرعىلاۋدان كەيىن الەمدەگى ەكىنشى تەرەڭ ۇڭعىما جانە ازياداعى ءبىرىنشى تەرەڭ ۇڭعىماعا اينالدى. بۇل كەن ورىندارىنىڭ ماڭىزدى كەزەڭى بولىپ تابىلادى. تەرەڭ جەردەگى بۇل عىلىمي زەرتتەۋلەر مۇناي مەن گازدى بارلاۋدى ماقسات ەتكەن.
ايتا كەتەيىك، ۇڭعىمانىڭ تەرەڭدىگى 11 مىڭ 100 مەتر دەپ جوبالانىپ، بۇرعىلاۋ جۇمىسى وتكەن جىلى 30-مامىردان باستالعان بولاتىن.
«قىتايدىڭ العاشقى ون مىڭ مەتر تەرەڭدىكتەگى جەر استى تەكسەرۋ ۇڭعىماسى بولدى. بۇل قىتاي ەلىنىڭ تەرەڭ جەر قىرتىسىن زەرتتەۋ سالاسىنداعى ەڭ ۇلكەن جەتىستىككە قول جەتكىزگەندىگىنەن دەرەك بەرەدى»، دەپ جازادى قىتايلىق باسىلىم.
اۆتور
بەيسەن سۇلتان
