ۇ ق ك اتىنان الاياقتار ادامدارعا قوڭىراۋ شالىپ جاتىر: كوميتەت مالىمدەمە جاسادى
استانا. KAZINFORM - ۇلتتىق قاۋىپسىزدىك كوميتەتى اتىنان ارەكەت ەتەتىن ادامداردىڭ الاياقتىق فاكتىلەرى جيى تىركەلىپ جاتىر. وسىعان وراي ۇ ق ك مالىمدەمە جاسادى.
قىلمىسكەرلەر ازاماتتارعا ۇقك جانە باسقا دا ۆەدومستۆولاردىڭ قىزمەتكەرلەرى رەتىندە تەلەفون سوعىپ، ولاردىڭ بانك شوتتارىندا كۇماندى وپەراتسيالار نەمەسە ءىستى تەرگەۋ تۋرالى حابارلايدى.
جەكە جاعدايلاردا الاياقتار ۇلتتىق قاۋىپسىزدىككە دەگەن بولجامدى قاۋىپ-قاتەردى نەگىزگە الا وتىرىپ، تەرروريزم ارەكەتىن توقتاتۋ ءۇشىن ارەكەت قاجەت دەپ مالىمدەيدى. شىنايىلىق ءۇشىن جالعان كۋالىكتەردى (مىسالى، مەسسەندجەردەگى بەينەقوڭىراۋلار ارقىلى) كورسەتەدى نەمەسە ۇ ق ك لوگوتيپى بار جالعان قۇجاتتاردى جىبەرەدى.
اڭگىمە بارىسىندا ولار ازاماتتاردى اقشالارىنا قاۋىپ ءتونىپ تۇرعانىنا سەندىرىپ، قورعانىش نەمەسە تەكسەرۋ ءۇشىن قاراجاتتى قاۋىپسىز شوتقا اۋدارۋدى ۇسىنادى. كەيدە ولارعا جيناقتارىن قۇتقارۋ ءۇشىن نەسيە الۋعا كەڭەس بەرىلەدى. سودان كەيىن اقشا قىلمىسكەرلەر باقىلايتىن شوتتارعا اۋدارىلادى.
سونداي-اق ۇ ق ك- ءنىڭ جالعان قىزمەتكەرلەرى جۇمىسقا ورنالاسۋعا جاردەمدەسۋ، الەۋمەتتىك-تۇرمىستىق ماسەلەلەردى شەشۋ ءۇشىن جانە ت. ب. اقشالاي سىياقىعا ءوز قىزمەتتەرىن ۇسىنۋى مۇمكىن.
بۇل ارەكەتتەر قىلمىستىق كودەكستىڭ 190 (الاياقتىق) جانە 385 (جالعان قۇجاتتاردى، مورتابانداردى، مورلەردى، بلانكىلەردى، مەملەكەتتىك پوشتا تولەمى بەلگىلەرىن، مەملەكەتتىك ناگرادالاردى قولدان جاساۋ، دايىنداۋ نەمەسە وتكىزۋ) باپتارىنا جاتادى.
وسىعان بايلانىستى ۇقك قۇقىق قورعاۋ جانە ارنايى ورگاندار قىزمەتكەرلەرى ازاماتتارعا ەشقاشان قوڭىراۋ شالىپ، قانداي دا ءبىر شوتتارعا اقشا اۋدارۋدى تالاپ ەتپەيتىنىن، سونىڭ ىشىندە تەرروريستىك ارەكەتتەردى توقتاتۋ سىلتاۋىمەن دە شاقىرمايتىنىن ەسكە سالدى.
- مۇنداي قوڭىراۋلار نەمەسە ۇسىنىستار الىنعان جاعدايدا پوليتسيا ورگاندارىنا حابارلاسۋ كەرەك. ازاماتتارعا قىراعىلىق تانىتۋ قاجەت ەكەندىگىن ەسكەرتەمىز، - دەلىنگەن حابارلامادا.
ايتا كەتەيىك، اتىراۋدا 90 جاستاعى زەينەتكەردىڭ 6 ميلليون تەڭگەسىن العان الاياق سوتتالدى.
