شەتەلدىكتەر قازاقستان ەمحانالارىنا قالاي تىركەلە الادى

استانانىڭ قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى اينۇر تولەۋوۆا شەتەل ازاماتتارىنىڭ قازاقستاندا مەديتسينالىق كومەك الۋ ءتارتىبىن ءتۇسىندىردى، دەپ حابارلايدى قازاقپارات ءتىلشىسى.

«بۇدان بىلاي ەۋرازيا ەكونوميكالىق وداعىنا مۇشە مەملەكەتتەردەن كەلگەن ەڭبەك ميگرانتتارى ەمحاناعا تىركەلۋ ءۇشىن ەرىكتى مەديتسينالىق ساقتاندىرۋ ءپوليسىن ساتىپ الاتىن بولدى. ولار ەمحانانىڭ تىركەۋ بولىمىنە بارىپ، ءوتىنىش جازۋى كەرەك. ازاماتتىعى جوق، قازاقستانعا ۋاقىتشا نەمەسە باس ساۋعالاپ كەلگەندەر دە ەرىكتى مەديتسينالىق ساقتاندىرۋ تۋرالى كەلىسىمشارت نەگىزىندە العاشقى مەديتسينالىق- سانيتارلىق كومەك كورسەتەتىن ۇيىمعا تىركەلەدى. اتالعان كەلىسىمشارت كۇشى جويىلعاندا ولار دا مەديتسينالىق ۇيىمنان اۆتوماتتى تۇردە شىعارىلىپ وتىرادى»، - دەپ ءتۇسىندىردى ا. تولەۋوۆا استانا كوممۋنيكاتسيالار قىزمەتىندە وتكەن بريفينگتە.

سپيكەردىڭ ايتۋىنشا، العاشقى مەديتسينالىق-سانيتارلىق كومەك كورسەتەتىن ۇيىمعا جۇگىنگەندە ماماندار تىركەۋ تۋرالى ءوتىنىشتى مەديتسينالىق اقپاراتتىق جۇيەگە جىبەرەدى.

تىركەۋ تۋرالى ءوتىنىش نەمەسە ناقتى سەبەبى بار باس تارتۋ شەشىمى 1 جۇمىس كۇنى ىشىندە قابىلدانادى. بۇل مەملەكەتتىك قىزمەت ەلەكتروندى ۇكىمەت پورتالىندا كورسەتىلەدى.

ايتا كەتەيىك، جىل سايىن ەلىمىزدە 15-قىركۇيەكتەن 15-قاراشاعا دەيىن ەمحانانى ەركىن تاڭداۋ ناۋقانى وتەدى.

ازاماتتار ءوزىنىڭ تۇرعىلىقتى شەگى بويىنشا ەمحانالاردىڭ ءبىرىن تاڭداي الادى. پاتسيەنت قىزمەتتەر پاكەتىن 2024 -جىلدىڭ 1-قاڭتارىنان باستاپ الا باستايدى، ياعني 31-جەلتوقسانعا دەيىن بۇرىن تىركەلگەن ەمحاناعا قارالۋدى جالعاستىرادى.

سونداي-اق، ناۋقاس باسقا ەلدىمەكەندە (ءىسساپاردا، قوناقتا) اۋىرىپ قالسا، شۇعىل مەديتسينالىق كومەك الۋ ءۇشىن جاقىن ماڭداعى مەديتسينالىق ۇيىمعا جۇگىنە الادى نەمەسە جەدەل مەديتسينالىق جاردەم بريگاداسىن شاقىرا الادى.