توقايەۆ: قىتايمەن ەنەرگەتيكالىق كەلىسىم بەكىتۋگە دايىندالامىز

استانا. KAZINFORM - پرەزيدەنت قاسىم-جومارت توقايەۆ تاۋەلسىزدىك سارايىنداعى «ورتالىق ازيا- قىتاي» سامميتىندە قازاقستان قىتايمەن ەنەرگەتيكا سالاسىنداعى تۇراقتى ىنتىماقتاستىقتى دامىتۋعا ارنالعان كەلىسىمگە قول قوياتىنىن ءمالىم ەتتى.

- ەنەرگەتيكا سالاسىنداعى ىنتىماقتاستىقتىڭ الەۋەتى وتە زور. ءبىز وزىق تەحنولوگيالارمەن الماسۋدى جانداندىرۋ جانە ەنەرگەتيكالىق ينفراقۇرىلىمدى جاڭعىرتۋ جوبالارىنا ءۇمىت ارتامىز. سونداي-اق وڭىرلىك ەنەرگەتيكالىق قاۋىپسىزدىكتى نىعايتۋعا، ەنەرگەتيكا كوزدەرىن تەحنولوگيالىق تۇرعىدان دامىتىپ، ءارتاراپتاندىرۋعا نازار اۋدارعان ءجون، - دەدى قاسىم-جومارت توقايەۆ.

مەملەكەت باسشىسى ەكىجاقتى ىنتىماقتاستىق جاڭارتىلاتىن ەنەرگيا كوزدەرى بويىنشا دا كەلەشەگىنەن ءۇمىت كۇتتىرەتىن جوبالاردى قامتيتىنىن اتاپ ءوتتى.

- قىتاي حالىق رەسپۋبليكاسىنىڭ اتوم ەنەرگەتيكاسىن دامىتۋداعى تابىستى، مول تاجىريبەسىن ەسكەرسەك، ءبىز وسى ستراتەگيالىق سالاداعى تۇراقتى ىنتىماقتاستىقتى دامىتۋعا مۇددەلىمىز. ەڭ جاقىن ارادا كەلىسىمگە قول قويۋعا دايىندالامىز. سونداي-اق جاسىل كلاستەر قۇرۋ، جاڭارتىلاتىن ەنەرگيا كوزدەرىن پايدالانۋ باعىتتارىندا پەرسپەكتيۆالى جوبالار بار، - مەملەكەت باسشىسى.

 اۋعانستاندى ساۋدا- ەكونوميكالىق قاتىناستارعا تارتۋ وسى ەلدى قالپىنا كەلتىرۋدى جىلدامداتادى. 
- ءبىزدىڭ ءوزارا ءىس-قيمىلىمىزدىڭ تاعى ءبىر اسپەكتىسى - ول اۋعانستان. ءبىزدىڭ ويىمىزشا، بۇل ەلدى ساۋدا-ەكونوميكالىق قاتىناستارعا تارتۋ ونى قالپىنا كەلتىرۋگە جانە حالىقارالىق وقشاۋلانۋدان شىعارۋعا ىقپال ەتەدى. ءدال وسى باعىتتا ءبىز اۋعانستان ۇكىمەتىمەن جۇمىس ىستەپ جاتىرمىز. قىتاي مەن ورتالىق ازيا ەلدەرىنە الماتى قالاسىندا ورتالىق ازيا جانە اۋعانستان ءۇشىن ب ۇ ۇ- نىڭ وڭىرلىك ورتالىعىن قۇرۋعا قولداۋ كورسەتكەنى ءۇشىن العىسىمدى بىلدىرەمىن، - دەدى قاسىم-جومارت توقايەۆ.

پرەزيدەنتتىڭ ايتۋىنشا، ءوڭىردىڭ بولاشاعى وسى اۋماقتاعى ەلدەردىڭ ءوزارا مۇددەلەردى ەسكەرە وتىرىپ، بىرلەسىپ ارەكەت ەتە الۋىنا بايلانىستى. وسى ورايدا «ورتالىق ازيا- قىتاي» فورماتى جاسامپاز ستراتەگيالىق سەرىكتەستىكتىڭ ايقىن ۇلگىسىنە اينالاتىنىنا سەنىم ارتتى.