توقايەۆ مەديتسينالىق ماقساتتاعى بۇيىمدار شىعاراتىن كاسىپورىندار كورمەسىن تاماشالادى
استانا. KAZINFORM - مەملەكەت باسشىسى قاسىم-جومارت توقايەۆ مەديتسينالىق ماقساتتاعى بۇيىمدار شىعاراتىن ەلوردالىق كاسىپورىندار كورمەسىن ارالادى. بۇل تۋرالى اقوردانىڭ باسپا ءسوز قىزمەتى حابارلادى.
مەملەكەت باسشىسىنا Heart Center Foundation قوعامدىق قورىنىڭ وكىلدەرى قازاقستانداعى كارديوحيرۋرگيا مەن ترانسپلانتولوگيانى دامىتۋ ميسسياسى تۋرالى اڭگىمەلەدى.
قاسىم-جومارت توقايەۆقا بيىل مامىر ايىندا ALEM يننوۆاتسيالىق اپپاراتىن شىعاراتىن زاۋىت قۇرىلىسى باستالعانى جونىندە اقپارات بەرىلدى. قازاقستاندىق ينجەنەرلەر مەن UMC جۇرەك ورتالىعى دارىگەرلەرىنىڭ بىرەگەي جۇمىسى زاماناۋي ترانسپلانتولوگياداعى باستى ماسەلە سانالاتىن دونورلىق ورگاندى ساقتاۋ ۋاقىتىنىڭ شەكتەۋلىلىگىن شەشۋدى كوزدەيدى.
جۇرەكتىڭ يشەميالىق اۋرۋلارىنىڭ ءتۇرلى فورمالارىن ەمدەۋ ىسىنە نازاربايەۆ ۋنيۆەرسيتەتى تەحنوپاركىنىڭ بازاسىندا ىسكە اسىرىلعان جوبا دا ءوز ۇلەسىن قوسپاق. «IHT Central Asia» ج ش س- ءى يسپانيالىق Iberhospitex S. A كومپانياسىنىڭ تەحنولوگياسىن اكەلىپ، ينتەرۆەنسيالدى كارديولوگيادا قولدانىلاتىن كورونارلىق ستەنت پەن باللوندىق كاتاتەر ءوندىرىسىن جولعا قويدى.
Eira Med فارماتسيەۆتيكالىق كەشەنى ەۋروپا وداعى ەلدەرى مەن ا ق ش-تان كەلەتىن مەديتسينالىق بۇيىمدار يمپورتىن الماستىرۋمەن جانە تەحنولوگيانى ترانسفەرلەۋمەن بەلسەندى تۇردە اينالىسادى.
بۇدان بولەك، پرەزيدەنتكە Kazecotech كاسىپورنىنىڭ عىلىمي-تەحنيكالىق جەتىستىكتەرى كورسەتىلدى. سوڭعى ءۇش جىلدا كومپانيا ەڭ ۇزدىك الەمدىك ستاندارتتارعا ساي كەلەتىن 250-دەن استام پروتەز دايىنداپ، 500 ادامدى Ottobock مۇگەدەك ارباسىمەن قامتاماسىز ەتكەن.
كورمەنى ارالاعان سوڭ قاسىم-جومارت توقايەۆ وتاندىق فارماتسيەۆتيكا يندۋسترياسى مەن مەديتسينا بۇيىمدارى ءوندىرىسىن دامىتۋدىڭ ماڭىزىن اتاپ ءوتتى.
