توقايەۆ مەديتسينا قىزمەتكەرلەرىنە كۇش كورسەتكەنى ءۇشىن جازانى كۇشەيتۋدى تاپسىردى
استانا. KAZINFORM - مەملەكەت باسشىسى مەديتسينا قىزمەتكەرلەرىنە كۇش كورسەتەتىندەرگە قارسى زاڭدى كۇشەيتۋدى تاپسىردى. بۇل تۋرالى قازاقستان پرەزيدەنتىنىڭ كەڭەسشىسى - باسپا ءسوز حاتشىسى رۋسلان جەلدىباي جازدى.
- مەملەكەت باسشىسى مەديتسينا قىزمەتكەرلەرىنە كۇش قولدانىپ جانە قاتىگەزدىك تانىتقان ارەكەتتەرگە قاتىستى جازانى قاتاڭداتۋ ماقساتىندا ۇلتتىق زاڭناماعا وزگەرىستەر ەنگىزۋ تۋرالى پارلامەنت دەپۋتاتتارىنىڭ، دەنساۋلىق ساقتاۋ سالاسى وكىلدەرىنىڭ جانە بەلسەندى ازاماتتاردىڭ ۇسىنىسىن قولدايدى، - دەلىنگەن حابارلامادا.
دارىگەرلەردىڭ دەنساۋلىعىنا نۇقسان كەلتىرىپ، ومىرىنە قاۋىپ توندىرەتىن مۇنداي كەلەڭسىزدىكتەرگە «زاڭ جانە ءتارتىپ» قاعيداتىنا سايكەس قۇقىقتىق تۇرعىدا باتىل تۇردە توسقاۋىل قويىلۋى كەرەك.
- پرەزيدەنت ۇكىمەتكە ءتيىستى زاڭنامالىق تۇزەتۋلەر ازىرلەۋدى تاپسىردى. بۇل باستاما پارلامەنتتە ازاماتتىق قوعام وكىلدەرىمەن بىرگە تالقىلانادى، - دەپ جازدى باسپا ءسوز حاتشىسى.
ەسكە سالا كەتەيىك، ءماجىلىس دەپۋتاتى اسحات ايماعامبەتوۆ ەلدە مەديتسينا قىزمەتكەرلەرىنە كۇش كورسەتۋ دەرەكتەرى جيىلەپ بارا جاتقانىن العا تارتىپ، بۇل ماسەلەگە زاڭ جۇزىندە ناقتى ءارى قاتاڭ شارالار قابىلداۋ قاجەت ەكەنىن ايتقان بولاتىن.
