پەتروپاۆلدا سوتتالعان ايەلدەر ءۇشىن بەينەتاكسوفون جۇيەسى ىسكە قوسىلدى

پەتروپاۆل. KAZINFORM - پەتروپاۆل قالاسىنداعى №50-تۇزەۋ مەكەمەسىندە جازاسىن وتەۋشى ايەلدەرگە بەينەتاكسوفون جۇيەسى ەنگىزىلدى.

جوبا مەملەكەت باسشىسى قاسىم-جومارت توقايەۆتىڭ وسى جىلدىڭ 14-ناۋرىزىندا قۇرىلتايدا بەرگەن تاپسىرماسىن ورىنداۋ اياسىندا جانە «زاڭ مەن ءتارتىپ» تۇجىرىمداماسىن ىسكە اسىرۋ شەڭبەرىندە جۇزەگە اسىرىلدى.

باس پروكۋراتۋرا مالىمەتىنشە، باستاما ەڭ الدىمەن، كامەلەتكە تولماعان بالالارى بار انالارعا جاعداي جاساۋدى كوزدەي وتىرىپ، قاماۋداعى ازاماتشالاردىڭ تۇرمىس جاعدايىن ىزگىلەندىرۋگە باعىتتالعان.

جاڭا جۇيە ارقىلى سوتتالعان ايەلدەر جاقىندارىمەن بەينەقوڭىراۋ ارقىلى سويلەسە الادى. اربىرىنە جەكە ID- كود بەرىلگەن، بايلانىس تەك جەكە ىسىندە تىركەلگەن تەلەفون نومىرلەرىنە حابارلاسۋعا مۇمكىندىك بەرەدى. تۋىستارى Google Play ارقىلى «Soilephone» قوسىمشاسىن جۇكتەپ الىپ، بايلانىس اقىسىن وزدەرى تولەي الادى.

بەينەقوڭىراۋدان بولەك، اۋديو جانە بەينەحابارلاما، SMS الماسۋ قىزمەتى قولجەتىمدى.

بارلىق اقپارات قورعالعان سەرۆەردە ساقتالادى، بۇل دەربەس مالىمەتتەردىڭ سەنىمدى قورعالۋىن قامتاماسىز ەتەدى.

جۇيەنى ەنگىزۋ كەلەسىدەي ناتيجەلەرگە قولجەتكىزۋگە مۇمكىندىك بەرەدى:

- سوتتالعانداردىڭ كۇيزەلىس دەڭگەيىن تومەندەتۋ؛

- وتباسىلىق بايلانىستاردى ساقتاۋ جانە نىعايتۋ؛

- زاڭعا باعىنۋعا ىنتالاندىرۋدى ارتتىرۋ؛

- ايەلدەردىڭ بوستاندىققا شىققاننان كەيىنگى قوعامعا بەيىمدەلۋىنە ىقپال ەتۋ.

جوبا وبلىس پروكۋراتۋراسىنىڭ، قىلمىستىق-اتقارۋ جۇيەسى دەپارتامەنتىنىڭ جانە «جاس تارلان» ج ش س-نىڭ قاتىسۋىمەن ىسكە اسىرىلىپ جاتىر.