پەتروپاۆلدا جىلىكتى قولمەن سىندىرۋدان جارىس ءوتتى

پەتروپاۆل. KAZINFORM - ناۋرىز مەيرامىنا وراي پەتروپاۆلداعى مەكتەپتەردىڭ بىرىندە جىلىك سىندىرۋدان العاش رەت اتا-انالار مەن وقۋشىلار، ۇستازدار اراسىندا جارىس ءوتتى.

جارىستى پەتروپاۆل قالاسىنىڭ نازاربايەۆ زياتكەرلىك مەكتەبى ۇيىمداستىردى. وعان 50 شاقتى ادام قاتىسىپ، ەپتىلىك پەن بىلەكتىڭ كۇشىن سىنادى.

- جىلىك سىندىرۋدان جارىس وتەدى دەگەننەن كەيىن كەلىپ قالدىق. كەرەك ءىس-شارا دەپ ويلايمىن. بالالارىمىز سالت-ءداستۇردى ءبىلىپ ءوسۋى قاجەت. بۇگىن قولدى اۋىرتىپ الماس ءۇشىن ورامالدى قالاي وراۋ كەرەك، قالاي ۇرۋ جايلى، ايتىپ، كورسەتتىك. ءوزىمىز دە كەرەمەت اسەر الدىق. سىندىرماساق تا، قاتىستىق. ءداستۇر ۇمىت قالعان جوق، قىستا سوعىم ەتىن اسىپ، توي-تومالاق وتكىزگەندە جىگىتتەر جاعى جىلىك سىندىرىپ، كۇشىن سىناپ جاتادى، - دەيدى وقۋشىنىڭ اكەسى اسىل قازبەكوۆ.

ۇيىمداستىرۋشىلاردىڭ ايتۋىنشا، جىلىك سىندىرۋ - قازاقتىڭ كونە ويىندارىنىڭ ءبىرى. ونىڭ ءمانى - تويدان قالعان جىلىك سۇيەگىن قولمەن جارىپ، سىندىرۋ. بۇل ويىن كۇش، توزىمدىلىك جانە دۇرىس تەحنيكانى قاجەت ەتەدى. ەجەلگى ۋاقىتتا جىلىك سىندىرۋ تەك ويىن-ساۋىق قانا ەمەس، سونىمەن قاتار بوزبالالاردىڭ كۇشى مەن ەپتىلىگىن كورىپ، ەرەسەك ومىرگە دايىندىعىن تەكسەرۋ ءتاسىلى بولعان.

- بۇرىن كىشكەنتاي كەزىمدە اكەمنىڭ دوستارى كەلىپ وسىلايشا جىلىك سىندىرىپ وينايتىن. مەن دە ءوز كۇشىمدى سىناپ كورمەك بولدىم. بۇل ويىندا ءبىرىنشى بولىپ ۇرعاندارعا قيىن، ال مەنىڭ جولىم بولدى، سوڭىنا قاراي ۇرعاندىقتان تەز سىندى دەپ ويلايمىن، - دەيدى مەكتەپ وقۋشىسى اليحان گۋسەينوۆ.

جارىس بارىسىندا قاتىسۋشىلار بارلىعى 4 جىلىكتى سىندىرىپ، مىقتىلاردى انىقتادى. مەكتەپ ۇجىمى بۇل ءىس-شارانى داستۇرگە اينالدىرۋدى جوسپارلاپ وتىر.

اۆتور

اقەركە داۋرەنبەك قىزى