پەتروپاۆلدا جارتى جىلدىڭ ىشىندە كولىگىنە جالعان ءنومىر تاققان 5 ادام انىقتالدى
پەتروپاۆل. KAZINFORM - پەتروپاۆلدا جالعان مەملەكەتتىك نومىرمەن جۇرگەن جىگىت سوت شەشىمىمەن ءبىر تاۋلىككە اكىمشىلىك قاماققا الىندى.
ەندى ونىڭ ءبىر جىل بويى اۆتوكولىك جۇرگىزۋگە قۇقى جوق.
سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆلدىڭ 30 جاستاعى تۇرعىنى «Lada 21214» اۆتوكولىگىنە جالعان مەملەكەتتىك ءنومىر سالىپ جۇرگەن. پوليتسەيلەر بۇل فاكتىنى جول ءجۇرىسى قاعيدالارىن بۇزۋدى اۆتوماتتى تۇردە تىركەيتىن بەينەجۇيەلەر ارقىلى انىقتادى.
پروتسەسسينگتىك ورتالىقتىڭ قىزمەتكەرلەرى جالعان مەملەكەتتىك نومىرمەن ءجۇرۋ فاكتىسىن انىقتاعان جاعدايدا پوليتسيانىڭ بارلىق مۇددەلى قىزمەتتەرىنە حابارلايدى.
بەينەباقىلاۋ ينسپەكتورلارى جانە قول استىندا «مەگاكام. قورعاۋ» باعدارلاماسى بار پاترۋلدىك ينسپەكتورلار ىزدەۋدە جۇرگەن اۆتوكولىكتىڭ جۇرگەن جەرىن قىسقا ۋاقىت ىشىندە انىقتايدى.
ءتارتىپ ساقشىلارىنىڭ ايتۋىنشا، وتكەن جىلدىڭ قىركۇيەك ايىنان باستاپ پەتروپاۆلدا قوسىمشا ينتەللەكتۋالدىق بەينەجۇيەلەر ورناتىلعاننان بەرى جالعان مەملەكەتتىك نومىرلەردى پايدالانۋدىڭ 5 فاكتىسى انىقتالعان. بۇگىندە وبلىس ورتالىعىندا مۇنداي بەينەجۇيەلەردىڭ سانى 50 گە جۋىق.
بۇعان دەيىن س ق و اۋماعىندا 1-اقپاننان باستاپ «براكونەر» جەدەل- پروفيلاكتيكالىق ءىس-شاراسى وتكىزىلىپ جاتقانىن جازعان ەدىك. ءبىر اپتا ىشىندە ءتارتىپ ساقشىلارى اڭ اۋلاۋ ەرەجەلەرىن بۇزعان 88 فاكتىنى انىقتادى.
اۆتور
اقەركە داۋرەنبەك قىزى
