تۇركىستان وبلىسىندا بيوقوسپالار وندىرەتىن زاۋىت سالۋ جوسپارلانىپ وتىر

استانا. KAZINFORM - مەملەكەت باسشىسى Orzax Group باسقارما ءتوراعاسى سەلمان اليموعلىنى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.

الەمدەگى بيولوگيالىق بەلسەندى قوسپالار نارىعىندا كوشباسشىلاردىڭ ءبىرى سانالاتىن كومپانيا باسشىلىعىمەن كەزدەسۋدە بىرلەسكەن جوبالاردى جۇزەگە اسىرۋ ماسەلەسى قاراستىرىلدى.

قاسىم-جومارت توقايەۆ Orzax Group كومپانياسىنىڭ تۇركىستان وبلىسىندا بيولوگيالىق بەلسەندى قوسپالار وندىرەتىن زاۋىت سالۋ شەشىمىنە قولداۋ ءبىلدىرىپ، بۇل باستاما وتاندىق فارماتسيەۆتيكا سالاسىن ءارتاراپتاندىرۋعا جانە ەلىمىزدىڭ ەكسپورتتىق الەۋەتىن ارتتىرۋعا ەلەۋلى ۇلەس قوساتىنىن اتاپ ءوتتى.

سەلمان اليموعلى كومپانيانىڭ قازاقستاندا وندىرىستىك بازانى كەڭەيتۋمەن عانا شەكتەلمەي، عىلىمي-زەرتتەۋ جانە يننوۆاتسيا باعىتتارىن دا دامىتۋعا نيەتتى ەكەنىن جەتكىزدى.

بۇگىنگى تاڭدا Orzax Group بيولوگيالىق بەلسەندى قوسپالاردىڭ 150 ءتۇرىن ءوندىرىپ، الەمنىڭ 60 ەلىنە ەكسپورتتايدى. قازاقستانداعى ءوندىرىس جوباسىنا كومپانيا 40 ميلليون دوللار ينۆەستيتسيا قۇيىپ، 500 ادامدى تۇراقتى جۇمىسپەن قامتۋدى جوسپارلاپ وتىر.

ەسكە سالا كەتەيىك، بۇعان دەيىن مەملەكەت باسشىسى Tiryaki Holding كومپانياسىنىڭ اتقارۋشى ديرەكتورى سۇلەيمەن تيرياكيوعلىنى قابىلدادى.